Dende hai unos años préstame pasiame pela Selmana Negra que se celebra en Xixón, esquerando nos puestos de llibros, nos que siempre s'atopa dalguna curiosidá, y observando toos aquellos puestos de ropes y bixos, que tanto se multiplicaron nos caberos años, y que xunto col golor a comida y el ruíu atronador de la música al altu la lleva, anublen el sentíu que tien esti eventu lliterariu. Esti añu participé como ponente con una charla sobre «poesía negra», invitada pola organización «Poetas del Mundo2 de la que ye embaxador n'España Xuanxo Bardibia. Un conceutu nuevu que surde nesti contestu lliterariu, que consideramos distintu al de la «poesía negra» tradicional, basada nel ambiente afro-cubanu o en xeneral afro-americanu, que trata tou tipu de temes. Dende l'entamu, la Selmana Negra tuvo dedicada a la «novela negra» y nós quisimos con esta intervención abrir la posibilidá d'inxertar la «poesía negra», nesti foru lliterariu. Na conferencia que titulé «Delles pincelaes sobre poesía negra», fixi un repasu por dalgunos autores que tienen producción nesti «xéneru», que yá foi prauticáu por escritores de renome, siendo García Lorca ún de los más representativos. Autores qu'inxertaron nos sos versos temes como la muerte tráxica, l'horror y les consecuencias de la marxinación social. Dempués del recital, a cargu Xuanxo Bardivia, Carlos Rubio, Chema Rubio, Esperanza Medina, Juan José Domínguez Piris y Esther García, los poetes asistentes entamamos una tertulia sobre los temes y conteníos que pueden conformar la poesía negra y tamién sobre situaciones escayoses qu'observamos na nuesa sociedá, y que son yacimientos bayurosos a la hora de componer un poema «negru».
Inmersos nesta crisis xeneralizada, que se xenera, ente otres causes, como reacción a un tipu de capitalismu xabaz, xeneráu nesta sociedá inda más xabaz, onde reinen l'espilfarru, el consumismu, la sinvergoncería y los vividores; fartos de ver crímenes y asesinatos na televisión y otros medios, que se recréen na desgracia ayena y escudriñen nos requeixos más escuros p'alimentar el morbu. Esto ye lo que güei viende en dalgunos xéneros lliterarios. Güei hai munchos autores qu'algamen l'ésitu valiéndose de temes escayosos. Crímenes, mosntruosidaes, enfermedaes síquiques, vampirismu y esviaciones sexuales son producciones monstruoses, que la publicidá y les mafies lliteraries, encárguense de que seyan «best sellers». Como si güei la lliteratura tuviera avidez de golor fediondu. Tolo que cheira ye atrautivu. Güei, como ayeri, la sociedá na que vivimos úfrenos una riestra de posibilidaes d'espeyar l'horror, la violencia, la marxinación y la desigualdá y les sos consecuencies. Too ello llévanos polos sendeiros escuros d'esta nuesa sociedá. Pero los poetes tenemos tamién otros recursos que son sofitu y fonte de versos p'amosar la guapura de la vida. Amás de los temes referíos a lo «negro», hai otros colores que pinten y allumen los nuesos poemes.
