Obligáu pol comunicáu que la Sala de Gobiernu del Tribunal Superior de Xusticia d'Asturies fexo públicu'l miércoles 27 quexándose de la parcialidá demostrada, en declaraciones a los medios, pol delegáu del Gobiernu español p'Asturies nel casu que dio con Agustín de Luis en prisión, a don Gabino de Lorenzo, vese que dotáu de reflexos felinos, nun-y vagó remiti-y una carta conciliadora y supuestamente aclaratoria al presidente del TSJA. Tuvimos noticia d'ella nesti periódicu al otru día. Cito literalmente: "En mis declaraciones sobre Agustín de Luis expresé mi máximo respeto a la sentencia que le condenó. Siempre digo que las resoluciones judiciales se acatan y se cumplen, no se comentan ni se critican." Nun tengo claro la veracidá de la primer oración y nun veo qué argumentos hai pa la segunda.
¿Qué fue lo que declaró De Lorenzo a los medios depués de qu'Agustín de Luis ingresare en Villabona faciendo chistes sobre que llevaba, en maletín, ocho bombes y el teléfonu de la xueza que lu condenare? Literalmente, lo mesmo qu'acaba usté de lleer: "Una sentencia hay que cumplirla porque ni se discute ni se critica." Y: "Como delegado del Gobierno tengo que cumplir la ley y la cumplo, pero también pido respetar la dignidad de las personas." Yo, d'equí, nun saco en conclusión "el máximo respeto a la sentencia" a nun ser que respetu sea sinónimu de resignación, que nun me paez. ¿Y por qué nun se van comentar, o hasta criticar, les sentencies? ¿Ónde pon que ye ilegal? ¿Qué ciudadanía amordazada imaxina o desea'l delegáu del Gobiernu?
Nes polémiques declaraciones del 22 que fueron causa de la nota del TSJA, De Lorenzo, pidiendo clemencia pública pal que fuere'l so subordináu nel ayuntamientu d'Ovieo, pintólu como "una persona ya jubilada". Bueno: esi argumentu podía amplialu a José Luis Iglesias Riopedre o a María Jesús Otero, anque nunca los tuviere en plantilla nel pasáu, que tamién tán llevando madera curioso. De toles maneres, nun paez qu'al delegáu del Gobiernu-y cayere inocentemente de la boca la espresión "persona jubilada". Les palabres dicen más de lo que trescribe l'aséptica definición d'un diccionariu y el términu "xubiláu", por desgracia, lleva arrecostines una capa de contaminación semántica que lu relaciona cola indefensión, col desamparu. Algún ciudadanu poco informáu, sintiendo a De Lorenzo, podía pensar qu'Agustín de Luis ye una especie de yayoflauta que sufre los abusos del Estáu cola única y ruina defensa d'un xiblatu y un xalecu reflectante. Pero esti xubiláu, dende la so residencia de Salinas y delantre un periodista de LA NUEVA ESPAÑA, gritába-y por teléfonu, imperiosu, a un capitán de la Guardia Civil: "¡Al Rubín no me lleváis, no me lleváis!" Nun sé yo qué yayoflauta se considera en condiciones de negociar, nesos términos, el so arrestu.
Nun quiero dexar pasar otru de los comentarios de De Lorenzo en defensa del so antiguu xefe de Policía: "Uno puede [?] tener más o menos luces, pero no se puede destrozar a una persona que ya está bastante deshecha." Vaya. Asina qu'Agustín de Luis puede tener más o menos lluces. Eso suel decise cuando se piensa que'l más pesa menos que'l menos. Si soi yo, defenses d'esi estilu nun les quiero y a los amigos que les faigan bórrolos de l'axenda. Anque igual yera esa la idea.
