Anque los medios de comunicación anecien pintando al presidente en funciones como un hooligan semianalfabetu consagráu a la lectura de la prensa deportiva madridista, yo tengo pa mi que lo d'él son los deportes de combate. Quiero decir el pulsu seriu. Supongo que s'acuerda usté de les regles. Los rivales mírense intensamente a un palmu de distancia y el primeru en mover un músculu facial (normalmente porque-y entra la risa) pierde.
Mercedes Fernández, la comisionada n'Asturies del equipu del presidente, nun acaba de ver que, en realidá, Rajoy sigue engancháu a un campeonato inacabable de pulsu seriu que debió entamar allá pelos años escolares orensanos nes aules de les hermanes franciscanes misioneres d'O Carballiño, cuando garraría conciencia de la impasibilidá que lu diba convertir, col correr de los años, nel campeón imbatible que ye hoi. Cherines tien otros tiempos, los de la cuerda o la goma por poner un casu, más áxiles, más reblincones. Escápase-y la intensa virilidá, intrínseca al inmovilismu, de los pulsos serios qu'afronta'l so cabezaleru que, pol estilu de los maestros axedrecistes, caltién múltiples retos simultanios, ún con cada ciudadanu español, y cuenta ganalos toos. Y, cuanto más llarga la resistencia inespresiva del rival, más meritoriu'l trunfu. Nesti deporte, de la mano de la dilación va'l placer. Pero Cherines, repito, ignorante del gustirrinín combatiente de Rajoy, esmuélgase y quier velu ya vencedor, y propón cambiar les normes. Diz que'l parlamentu español tien que copiar el modelu asturianu d'investidura presidencial, un modelu que pon al frente del equipu de Gobiernu autonómicu a un paisanu al que namás quier nel puestu ún de cada siete electores, con derechu a presidir la mesa pero non a pedir de comer, porque nun hai presupuestu.
Acuérdome que, nos años universitarios, los de la mio quinta y ambiente usábemos l'argotismu "llamparizar". Lo mesmo que la llámpara s'agarra a la peña marina firmemente, ún podía llamparizar con una moza, nel coche d'unos amigos que te llevaben y te traíen de papu, de visita en casa d'unos conocíos madrileños... En xeneral, llamparizabes cuando te negabes, de manera egoísta, a soltar una situación conveniente con independencia de la opinión o del perxuiciu ayenos. Javier Fernández, por poner un casu, lleva un añu llamparizando, y con perspectives de continuidá. Agora, Gaspar Llamazarez paez que quier el protagonismu de la casamentera, buscando arimar la llámpara a los percebes en beneficiu de l'armonía nel pedreru. Nun sé, la comunicación molusca ye probe en signos y recursos. Pero eso ye lo de menos: lo importante ye que'l modelu de gobernante-llámpara funciona estructuralmente anque nun suponga beneficios pa la ciudadanía. Porque Cherines dexa pa prau que formar Gobiernu ye namás un trámite previu a lo qu'importa de verdá: gobernar, cosa que'l modelu asturianu nun garantiza, al revés: fai de menos. Lo primero, el cargu? la peña onde llamparizar.
