¡Probe osu de Moal, muertu na flor de la mocedá! Un puntu y aparte n'alcordanza d'él.
La muerte humanizólu. Tiráu a la llarga al borde la carretera, como nos lu enseñaron les semeyes que publicó la prensa, a tol mundu-y vieno a la cabeza que paecía más paisanu que plantígradu. Toi por dicir que los osos lleven dientro un home (o una muyer) que se revela cola boquiada final.
Asociaciones de cazadores desvincúlense de la muerte. Yo tampoco veo nesti casu un actu de caza. El cazador quier daqué de la pieza: alimentu o troféu. Pero'l matador del osu de Moal nun-y cortó llacones pa la fabada nin garres pa colgar virilmente del pescuezu: "stricto sensu", nun fue un cazador el que lu mató. Habrá que-y buscar otru motivu al fechu y otra denominación al responsable.
La primera pue ser cornudu. Nun descarto la venganza por celos. Igual l'osu de Moal tenía relaciones cola muyer del autor del disparu, a saber. Hai precedentes. Un cuentu de los hermanos Grimm narra cómo un osu (que tamién llevaba dientro un paisanu) cortexó con ésitu a una roxa xermana. Esti casu pue ser pol estilu. Procedente de l'auditoría de chigres avezada, el matachín vuelve pa casa d'escurecida pegando tumbos, empapiellón, flácidu. Túmbase enriba la cama y alcuentra ente les sábanes unes serdes pinchones, fadiantes, que lu faen rocear, porque la muyer ta depilada. D'ehí la venganza, d'ehí la muerte.
Otra posibilidá ye que se trate d'unes práctiques. Nun digo práctiques de tiru, sinón d'asesinatu. Dispara-y a un osu de cientu cinco kilos ye lo más asomeyao a facelo contra un ser humanu. El tirador ya tien el deu caliente pa subir al siguiente nivel de presa, que somos usté o yo. Si ye esti segundu casu, y nun media un asuntu de cuernos (que paez que pide más discreción por parte del damnificáu), nun me diba estrañar gota que, animáu con tres o cuatro cacharros, el gran matachín esbabaye perende sobre la fazaña. A ver si hai suerte, descúbrese y la xusticia retíra-y la licencia d'armes (¡eso como poco!), si ye que la tien, y dormimos toos más tranquilos.
Va perdoname una cita cultural: la muerte del osu de Moal traime a la cabeza una secuencia de "Hores desesperaes", película de Cimino de les más floxines. Sálvase la secuencia que-y digo. Ún de los malos, maizón él y toscu como un osu, escorríu pola policía, muerre a tiros en mediu la naturaleza de Utah, mirando los cielos azules y les peñes d'arenisca d'alredor. Aquella grandeza postrera na mirada del criminal, los altos y les nubes que lleva impresos nos güeyos pal vacíu d'alluendi la vida, dignifíquenlu, llímpien-y l'historial sanguinariu que fue escribiendo con lletra azotada na so carrera frenética de delincuente. Envuélvelu la melodía emotiva de "Red River Valley", esa que n'España popularizó la Ilesia con una lletra qu'empieza "Junto a ti al caer de la tarde". Como él, l'osu de Moal (a saber si bandíu violentu coles vaques del llugar), feríu de bala ente les costielles, una zarpa apretando les tripes encaldies pol ardor del metal y la sangre, moribundu, vio los cielos azules de la patria canguesa, porque aquel día les nubes nun salieren de la fábrica que les produz, y golió'l verde de los ablanos, que poca promesa de comida traíen esti veranu de seca, y, esbarrumbáu ya en suelu, una abeya vieno a runfa-y a la oreya, y con ella volvió-y a la boca, por última vez, el tastu de tanta miel como-y quedaba por prebar, de tantu caxellu como-y quedaba por asaltar a él, rapazón de cuatro años. Y apagón.
Discúlpeme l'arranque sentimental.
¡Probe osu de Moal, muertu na flor de la mocedá! Un puntu final n'alcordanza d'él.
