A lo llargo la mio vida topé con dellos xugadores del Sporting. Herrero II, col que xugábamos al hípico saltando obstáculos nun solar que facía esquina ente les xixoneses San Xosé y Hermanos Fresno -supongo, naturalmente que'l futuru deportista ganaría siempre-; Rafael del Riego, compañeru d'estudios y amigu ocasional; Javier Manjarín, escolín nuna época en que se puso de moda xugar colos diccionarios de castellanu a manera de porteríes nes aules, mentantu llegaba'l profesor; Juan Muñiz, tamién escolín. Estos dos últimos, nel IES El Piles.
Con Abelardo Fernández coincidí nel IES de Roces, según me contara él un día, anque nun sé si-y di clase o si solo tábamos los dos al mismu tiempu. ¿Por qué lu llamo "santu"? ¡Home!, podía ser porque fizo un milagru paecíu a aquel de san Vicente Ferrer, cuando, diendo con priesa, vio caer a un albañil y díxo-y: "Tate quietu ehí hasta que vuelva". Y l'albañil tuvo ensin caer hasta la vuelta'l santu. Pues, de momentu, Abelardo caltuvo nel aire al Sporting dos años, ensin que llegase a caer, que p'allá diba.
Pero nun lo llamo "santu" por eso, sinón pol so comportamientu coles perres y pa col equipu xixonés. Abelardo tenía contratu hasta'l 2020. Pues bien, cuando lu cesaron, perdonó-y a la sociedá, el total de la ficha, incluido lo que quedaba de temporada. ¿Piensen ustedes que diba facer eso dalgún otru entrenador? ¿Díbamos facelo nosotros? ¡Por eso sí que ye un santu!
De toes formes yo espero que nun-y venga suceder aquello que dicen los dos últimos versos del sonetu de Quevedo qu'entama "La mocedad del año, la ambiciosa?". Aquello de: "De ayer te habrás de arrepentir mañana, / y tarde y con dolor serás discreto".
