Los veranos, al filu del mes de xunu, un grupu d'amigos veníamos aconceyándonos pa xintar con Pablo Ardisana na rodiada del so H.ontoria. (Ente los más asiduos nos caberos años, Ramón, Guillermo, Pedro, Elena y el qu'esto firma). El so hermanu Juan venía a traelu y llevalu en coche dempués de la llarga tertulia. L'otru hermanu, José María, quedaba en casa llevando les xeres familiares.
Pablo nun solo yera, en cualquier de los comedores en qu'aparásemos, siempre escoyíos por él, el protagonista por ser el gasayáu, sinón pola so conversación, la so gracia, el so saber cultural y aquel pelín de velenu nel obleru la so llingua con que daba repasu a los mundos de la cultura y la política, d'España en xeneral, d'Asturies en particular, y, especialmente, del so conceyu llaniscu. Fuera d'esos alcuentros, el teléfonu servíamos pa falar y xuninos y pa que, al so través, brillasen la cultura y l'inxeniu d'elli.
Pero anque atentu siempre a les sos palabres, yo nun podía dexar de tener siempre presentes, al bellume, dos imáxenes de Pablo. La primera, allá pel 78, cuando entamamos dar los primeros cursinos d'asturianu na Universidá, al llevantase Pablo metanos del salón d'actos y decinos: "Tola vida pa h.acenos que nun h.ablasemos l'asturianu y agora queréis que lu deprendamos". Y la segunda, la de la so fonda personalidá poética, la del autor que yera capaz d'ironizar a vegaes sobre sí mesmu; pero, sobre too, la del autor d'una estremada emoción de la naturaleza y del amor. De, por exemplu, estos dos poemes:
"Santa María de Lebeña"
...Peles teyes / el sol de la tardi / salla´l tiempu / con fesories d´espeyos / y d´ambura. / Alredior de la torre / una andarina / xuega a facer l´aura; / y nes uves guaña´l vinu / que será canciu y preciu. / Tien la nozal / una solombra seria / y el texu yá nun tien / memoria. Los arcos / abarquen un espaciu / d´escures penitencies... / Baxa la brisa azul / pel ríu y esguílase / nos chopos, que tremen / comu yo tremaría / si te besara cola lluna / allí, xunto a la ilesia.
"Nun semeyu de ñoble perra azul"
Esta mar. // A veces endelgázase / comu solombra de ñube, / ponse a durmir / nun semeyu de ñoble perra azul. / Esta mar, aquí, agora durmida, / foi la que resaló, sonámbula / d´esplumes, el to pisar de plumes, / la to cintura; y al ñegru, cerráu, / del to pelo dexó-y un nun sé qué / de llapislázuli. // Esta mar.
Un abrazu de tolos tos collaciones, zancañeru.
