La Nueva España

La Nueva España

Contenido exclusivo para suscriptores digitales

Esti Güevu Sal Quier

El cachopu de Castillejo

Sobre comer de papu

La Fiscalía declaróse ya: quier ver nel cuartón a Villa y a Castillejo. Y el SOMA que fue d'ellos diz que nun-y paez mal plan. ¡Qué vueltes da la vida!

Nun cuntamos que Villa, decadente como se presenta, anime'l procesu. Pero yo toi enfotáu en Pedro Castillejo: da tola traza de querer morrer matando. De les distintes maneres qu'usó nos díes pasaos pa dar a entender que les responsabilidaes por irregularidaes económiques que pudieren esistir nel sindicatu son de familia jipi, comunales, la más guapa planteóla como interrogante retóricu: "¿Comía yo solo en las sidrerías?"

L'espectador qu'asiste, con interés, saña, ascu o aburrimientu, a la representación d'esta pieza cómico-moralizante -especie d'autu profanu nel que s'enfrenten namás vicios, con ausencia total de virtúes que pudieren salir vencedores-, podía llegar a la conclusión de que les perres ausentes poles qu'entruga la llei sumiéronse íntegres, nel casu de Castillejo, pel so tránsitu intestinal y el d'otros afiliaos de momentu anónimos. Y sí: nun descartamos esa posibilidá porque, a fin de cuentes, somos asturianos. Castillejo, qu'introduz nel casu lo que podíemos bautizar como desfalcu gástricu, quier que'l SOMA enseñe la relación de fartures pagaes cola tarxeta institucional qu'él remanaba. La xueza retrucó-y qu'eso nun vien a cuentu colo que se trata. Yo, con independencia de si tien o non que ver uno con otro, nun entiendo en qué diba descargar de responsabilidaes a Castillejo facer públiques factures chigreres. Pongamos qu'una trai: "fabada: 3; cachopo: 2; pixín alangostado: 1; arroz con leche: 3; sidra: 9". ¿Y? ¿Quién pon la mano en fueu pa garantizar que nun fuere Castillejo l'únicu comensal d'esi menú?

Convincente o non, hai que-y reconocer a Castillejo qu'introduz un aspectu literariamente interesante nel casu: l'alcordanza gastronómica: vamos facer memoria de lo que vivimos y de cómo lo vivimos arrancando de lo que comimos, propón. La madalena de Proust alcuentra un equivalente asturianu nel cachopu de Castillejo. Comigo, la propuesta ya tuvo efectu. Fue lleer en prensa les palabres del sindicalista y, como arrastráu velozmente por ún d'esos cables invisibles que faen volar pel aire a los lluchadores nes películes chines d'artes marciales, de la mesma manera regresé nel tiempu una montonera d'años atrás, a una vez qu'asistí, de mozu, a una cena que corría a cuenta de la conseyería de Cultura. Seríemos media docena de persones. Nun me pregunte usté'l motivu del ágape: igual tenía que ver cola concesión d'un premiu literariu, lo más probable. El casu ye que'l responsable políticu (que yera d'un rangu inferior dientro'l mandarinatu: nun podía ser d'otra manera tratándose d'una cosa relacionada cola cultura, menos tovía siendo autóctona), nel momentu de pagar, echó mano de la tarxeta de créditu institucional y, posándola con muncha ceremonia na bandexina que presentaba la cuenta, díxonos a los asistentes, ufanu: "¡Qué bien sabe comer del erariu públicu!, ¿eh?" Yo vime Lázaro y que m'encamentaba'l clerigu boroñón: "Triunfa, Lázaro, y no hagas sino golosinear." Cumplíase'l refrán: había confianza y dio ascu. Ún ye educáu y nun yera plan meter los deos hasta'l gañote pa vomitar enriba la frase, digo enriba la mesa, y por eso retuvi los alimentos con flema asturiana de los valles. En realidá, fue una comida de les más provechoses de la vida: aprendí muncho, llevé pa casa unes palabres que nun me cayeron embaxo, reveladores. A mí, y nun ye por presumir, aquella comida nun me supo nin meyor nin peor que si la pagare del mio bolsu pero saqué en conclusión que nun pasa lo mesmo con tol mundu. Según pa quién, comer a cuenta del erariu públicu (o del patrimoniu sindical, por qué non) debe ser un ingrediente especial que tresforma l'alimentu más ramplón en manxar. Los recetarios de los grandes chefs mediáticos faen mal si nun lo tienen en cuenta al tiempu de describir el platu: "adórnese con una ramina de menta y una tarxeta de créditu institucional espetada de cantu".

miliorodriguezcueto.wordpress.com

Compartir el artículo

stats