Nun hai que s'engañar: la solución ambiental p'Avilés, Xixón y conceyos interpuestos pasa pel cierre d'Arcelor y de la térmica d'Aboño. Si non, de tiempu en tiempu, habrá que seguir peñerando mierda colos bronquios y los pulmones. Y hasta dirá algún determinista fisio-liberal que, a fin de cuentes, pa eso ye pa lo que tán.
Nun va muncho qu'un notable representante sindical asturianu escurecía la voz radiofónica pa entrugar a los ciudadanos, con medies palabres, si de verdá merecía la pena poner la respiración per delantre de los puestos de trabayu. Queréis respirar percima les vuestres posibilidaes, venía a avisar, argumentando a la manera de los socializadores de la culpa. Pues igual sí: igual ye más importante la salú del conxuntu de la comunidá que los sueldos d'una parte, o, dicho d'otra manera, el beneficiu común sobre la conveniencia de la minoría: receta clásica de la izquierda. Más pronto o más tarde, si nun ta pasando ya, el conflictu ecolóxicu va obligar a redefinir l'etiquetáu progresista / reacionariu, y a ver de qué llau queda cada sigla.
La tarde del escape fue la previa a que llegare agua en cuellu del aire nocturno de Galicia. Yo tengo observao, en Xixón, esa notable coincidencia: l'aire fiede cuando'l pronósticu anuncia que va llover. Seguro que lo d'Avilés fue tamién casualidá: falló un sensor y tal y tal, según cuenta la empresa. Pudo fallar más tarde tovía pero igual cambiaba'l turnu.
Ente los damnificaos, cinco persones atendíes polos servicios médicos. Aclaren los medios, eso sí, que ya padecíen problemes respiratorios previos. Ah, pues entós toos tranquilos: casi-yos podemos echar la culpa a ellos, por enfermos.
Otra damnificada ye la conseyera d'Infraestructures, Belén Fernández, que se tien que poner de perfil pa que nun-y dean los tiros de la oposición que dispara dende la izquierda. Ella nun tien la culpa porque nun trabaya n'Arcelor, vien a xustificase, y eso ye incuestionable. De lo que se trata de si Arcelor la chulea: a ella, al Gobiernu y a tolos asturianos que vivimos a la sombra de les chimeneones. Defiéndese de los que la acusen de permisividá cola empresa: venti espedientes-y lleva abiertos del 2015 p'aquí. El ritmu nun lu detalla, pero ye un crescendo revelador: seis en 2015, ocho en 2016, cinco nos primeros cuatro meses de 2017. Vaya: nun paecen mui eficaces. Da la impresión de que los responsables d'Arcelor nun van corriendo al báter cuando sienten la espresión "espediente sancionador" en boca de Belén Fernández. Nun sé a usté, pero si a mi me meten venti multes en dos años, pamidea échenme de casa.
Anote, ente'l martes 24, día de la fuga podre, y el miércoles 25, la cotización d'ArcelorMittal subió alredor de mediu puntu en bolsa. La prensa económica especializada revisa al alza los pronósticos de la empresa. Les sos aciones coticen un 30% percima del preciu oxetivu mediu y el potencial ye que tiren p'arriba otros dos o tres euros. Tien a Trump de so parte y contra les aceríes chines. Qué emocionante: hai qu'aguantar la respiración.
