"¿Siempre cuentos de xanes y lladrones? / Non apruebo, en verdá, la babayada?".
L'alcalde de Cabranes, don Gerardo Fabián, nel nome de la igualdá acaba d'asitiar nel panteón de la mitoloxía asturiana un nuevu ser preternatural, el xanín. Cualquiera que tenga un migayín de conocencia d'esi mundu de "los dioses derrotaos" sabe que los xaninos nun tienen consistencia autónoma, son solo episodios accidentales de xanes que dan a cuidar a los sos fíos, los xaninos, a los humanos.
Pero, en fin, nun ye esi, el del desconocimientu enciclopédicu, el fondu la cuestión, sinón la razón pola que don Gerardo se dedica a la creatividá mitolóxica. Faelo, según él, "por imperativu llegal", por aplicación, diz, de la Llei Orgánica 3/2007, pa la igualdá efectiva ente homes y muyeres.
¡Más gorda nun entra en prau! ¡Qué tendrá que ver Meres con Mieres! ¿Ónde tará escrito ehí -o se podrá camentar- que la igualdá tenga que ver coles representaciones festivo-mitolóxiques? Lo que pasa que l'alcalde pensará que-y da daqué votu, yá sea ente los pás afortunaos de tener un xanín, yá ente los defensores de la política del textil, digo, del xéneru.
Pero vamos suponer que lo cree de verdá. ¿Nun sería más fácil suprimir toa esa representación d'acompañamientu de xanes y dames d'honor, que suena siempre a una mentalidá d'otros tiempos? ¿O inventar figures nueves pa eses representaciones?
Y, sobre too, y yá que da un mordigañín en materia menor, por qué nun se pon en serio a facer cumplir la Llei según él la interpreta. ¿Por qué nun facer, por exemplu, que tolos equipos deportivos del conceyu sean mistos? ¿Y qué ye eso de que la patrona sea una muyer, Santolaya? Arremánguese, designe un patrón -santos hai a esgaya- pa cumplir cola igualdá.
Y si daquién lu critica diga vusté aquello de "Fiat iustitia, ruat caelum". ¡Que nun se diga!
