Pal mesmu día, el xueves pasáu, que se celebró en Xixón una concentración popular en simpatía col rapaz que llevó una paliza (a consecuencia d'ella ingresó n'hospital y hubo que lu sedar), los amigos de los agresores deteníos anunciaren otra, vamos llamala "alternativa", en solidaridá colos d'ellos. La prensa nun dio noticia d'esta segunda concentración, pueser que porque nun se llegare a celebrar, pueser que porque tuviere una respuesta insignificante. A saber. Lo notable ye l'atrevimientu de los convocantes. Más tovía: a les poques hores de l'agresión, col asuntu ferviendo nos medios, un grupu de chavalucos, amigos de los investigaos, colgaron semeyes n'Instagram nes qu'enseñaben, escamisaos y de romería nel Carmín de La Pola, eslóganes escritos pel cuerpu nos que pedíen la llibertá d'ún de los dos arrrestaos naquel momento (al otru, que lu partiere un rayu: deben tene-y menos mieu). Y húbolu que declaró a la prensa, en referencia al agredíu: "Algo haría".
"Algo haría". Seguro que non, que, ensin más, el rapaz tuvo la desgracia de cruzase colos sos atacantes en mal momentu. Pero ello nun fai menos necesario parase a pensar qué ye lo que se guarda detrás d'esi ambiguu pronome indefiníu col que'l deponente quier xustificar la paliza. Nun se refier, eso ta claro, a ningún delitu tipificáu pola llei sinón a una ofensa personal, un casu d'honor, si se quier entender asina. "Me miró mal", por exemplu. ¿Y en qué consiste esi "mirar mal", prototipu del insultu imperdonable, col que tan sensibilizáu ta determináu sector social? Trátase d'una mirada na que s'interpreta (tea o non presente) el despreciu, el facer de menos. Porque "el malmiráu" de ninguna manera va aceptar que ye menos, xusto porque ta íntimamente convencíu de selo. Él quier vivir otra escala de valores onde los estudiosos nun son más qu'él (o ella), los trabayadores nun son más qu'él, los mañosos nun son más qu'él, los guapos nun son más qu'él, los que viven ensin ayuda pública nun son más qu'él, los que lleven vida familiar arreglada nun son más qu'él? Una escala na que l'únicu valor ye negar, pola fuerza si fai falta, tolos valores sociales que lu faen a él, por contraste, un desgraciáu, un paria. "Algo haría" l'agredíu que valiere de recordatoriu, real o imaxinariu, del fracasu personal de los agresores, y eso hai que lo vengar. Y si, como consecuencia del actu "xusticieru", los medios regalen un protagonismu momentaniu, meyor tovía. Nel mesmu informativu de la tele nel qu'entrevisten a nun se sabe qué xente de bata blanca por vete a saber qué mierda de descubrimientu contra'l cáncer, alguién de la banda apaez entrando nun coche de la pasma coles manes esposaes a la espalda, y eso ye la gloria. ¡Guai, tío! ¡De puta madre! ¡Se sale! ¡Es la hostia! ¡Y lo vio todo el mundo, joder!... Ya nun yes un don nadie, otru guaje desocupáu que mata'l tiempu pegando pataes a les papeleres públiques pa entretenese: por fin, yes famosu.
Empiecen a comentase iniciatives p'atayar los actos de violencia xuvenil. Hailos que proponen entamar una especie de brigaes informatives/concienciadores y soltales a les noches pelos sitios d'ambiente. La intención ye bona pero yo soi pesimista. Tengo pa mi qu'estos rapazos folloneros son socialmente irrecuperables, y créame que quinxere tar enquivocáu. Abúltame que, de los trece o catorce años pa en delantre, la reeducación ye imposible. Pero algo habrá que facer. Pa nun empezar a construir la casa pel teyáu, igual convenía elaborar un estudiu sociolóxicu d'esta clase de delincuentes: en qué families viven, qué rentes hai en casa, qué trayectoria académica tienen o en qué ocupen el tiempu (por salir de duldes sobre si'l fútbol o los ximnasios con ring tienen algo que ver? porque aficionaos a tocar el violín o a la danza clásica, que yo sepa, detiénense pocos por bronca na vía pública). Intervención ensin diagnósticu, non. Hai que s'atrever a definir el problema con claridá, ensin mieu a gusmiar, si fai falta, nel tarrén de lo políticamente incorrecto. Nun ye cosa de broma: perder el tiempu pegando palos de ciegu benevolentes nun beneficia a los candidatos a agresores y muncho menos, y esto ye más importante, a les futures y pacífiques víctimes del fracasu rencorosu.
miliorodriguezcueto.wordpress.com
Cola ayuda de la Conseyería d'Educación y Cultura del Principáu d'Asturies
