En Xixón acaba de producise una noticia que pon en cuestión la xusticia de la renta social: delles families beneficiaes por esi dineru regaláu a través de les arques municipales cola finalidá de facer con él compres necesaries (electrodomésticos, mobiliariu, ropa?) revenden eses compres pa sacar d'elles dineru contante y sonante, probablemente porque yá tienen esos bienes en so casa o tienen otros ingresos (nun declaraos al pedir la mampurra de la renta social). Nun consta quién son o de qué triba son mayoritariamente eses families, anque se sabe qu'el casu reciente más comentáu ye'l d'un ciudadanu rumanu.
Ye evidente qu'estos acontecimientos -y otros que ensin dulda habrá- evidencien falta control por parte l'Alministración. Pero hai cuestiones estructurales de fondu que faen poner en cuestión esti tipu d'ayudes (o de regalos, en dalgunos casos).
Fai años, cuando se ponen en marcha polítiques sociales d'ayuda en dineru a persones con problemes, eses ayudes diben siempre arreyaes a obligaciones por parte del receptor p'asistir a programes que lu ayudasen a salir d'esa situación y a integrase nel trabayu. A midida que fuerces que se dicen más d'izquierdes van condicionando y ampliando les ayudes, esos requisitos esapaecen. Y, ensin embargu, nadie debería recibir nada por nada: esa debería ser la filosofía ineludible de cualquier ayuda.
Per otru llau, nos más enfotaos defensores de les ayudes universales y ensin mirar, hai una serie d'emociones/discursos onde, xunto a una especie de vocación caritatible de raigón cristianu y la concupiscencia'l votu, añera un sentimientu asemeyáu al de Carmen Calvo, el de qu'el dineru públicu nun ye de nadie.
Y, ensin embargu, cada céntimu d'euru ye d'otru, sal del trabayu, del esfuerzu y de los bienes d'otru. Y non de los millonarios: con frecuencia de trabayadores, muyeres o homes, que tán mui cerca del nivel de la renta básica. Y asina, lo qu'unos suden pa ganalo, otros llévenlo ensin esfuerzu nin compromisu.
