Arredondiando les estadístiques más recientes, n'Asturies hai un millón de persones y cuatrocientes mil vaques. Eso vien a ser dos persones y una pierna por vaca o, dicho d'otra manera, cinco piernes por cada cuatro pates. La diferencia ye mínima. Hai más vaques que católicos practicantes, que socios del Sporting o del Real Oviedo, qu'afiliaos al PP o al PSOE, que bablistes... hasta hai más vaques que lectores de LA NUEVA ESPAÑA, ¡ónde vas a parar! Y, pesie al homocentrismu que nos pierde como especie, los asturianos (bípedos) somos (o polo menos veníemos siéndolo hasta hai bien poco, cuando teníemos alguna de les cinco piernes enmadreñada y pisando'l cuchu del pueblu) medianamente conscientes de que les vaques tienen tantu derechu como nosotros a la titularidá xentilicia.
El xueves pasáu, dos vaques (asina, individualizaes, que non "les vaques") compartíen protagonismu y semeya n'otres tantes noticies nesti diariu. D'una parte, una rapazona pinta, mocha y con piercing ñarigón miraba a la cámara, sacando la tiesta pente les barres presidiaries d'una cooperativa dedicada a la selección d'exemplares, con una intensidá y una nobleza que facíen pequeña la del humanu que la acompañaba de pies, xerente de la empresa, aguantando dignamente lo que debía ser informe anual d'actividaes. Había na semeya algo d'aquelles pintures flamenques del XVI, retratu d'interior orgullosu de la prosperidá familiar, del aciertu entamador. Y confluyíen les dos miraes, la humana y la bovina, nel oxetivu de la cámara con tanta complicidá y tanta intelixencia como si nel proyectu que los xuntaba nun hubiere relación xerárquica nin dependencia, como si la empresa fuere ilusión común. "Las vacas lecheras asturianas superan en vida productiva al resto de las españolas", rezaba'l titular.
Mui cerca, pero nun cuentu distintu, componíen otra escena, más bucólica, una rapacina de Cangas y una vaca roxa, amigues, les dos pisando verde nun tesu de los que pierden agua pal Narcea, la vaca paciendo cola cerviz gacha, la moza amorosándo-y el pescuezu poderosu. Esto yera un cuadru inglés de Gainsborough y l'argumentu "Nacida para ser ganadera".
A los pies de les semeyes ye a lo que voi. El de la flamenca esplicaba: "Carlos Méndez, gerente de Ascol, al lado de una frisona, en el centro de reproducción de bovino de Cenero (Gijón)." El de la inglesa: "Laura García Fernández con su vaca 'Princesa', que su abuelo Celestino le regaló cuando era una xatina, hace cuatro años." (Toos somos quien a contestualizar el testu y concluir que Celestino yera güelu de Laura, non de Princesa, y que la xatina de 2014 yera Princesa, non Laura.)
Yo nun soi a evitar establecer una comparanza ente les dos noticies, o meyor, ente los dos pies, y gústame'l segundu y moléstame'l primeru. ¿Por qué la serenísima y reposada vaca llechera, prometedoramente lonxeva según el titular, queda anónima, presentada baxo la etiqueta xenérica de "frisona"? ¿Por qué nun ye naide? Hai tanta nobleza na so presencia que bien podía escribise: "Elke, en el centro de reproducción de bovino de Cenero (Gijón), al lado de un gerente de la cooperativa." Elke, o Inka, o Maike, si ye cosa de retrata-y, nel nome, la procedencia frisona. O, si non, Princesa, igual que la de Cangas, que, a fin de cuentes, dende Cordera la de Clarín p'acá, cualquier vaca asturiana ye una princesa d'Asturies.
miliorodriguezcueto.wordpress.com
