Tengo 56 años y nunca compré una entrada de fútbol. Soi de Xixón y, en tola vida, pisé El Molinón namás una vez, de chavalucu, convidáu por un amigu que tenía dos entraes infantiles, de les qu'echaben mano "rapacinos" con más que sombra de bigote en focicu prácticamente hasta que los delataba'l corte de pelu militar. D'aquella visita tengo'l siguiente recuerdu: algún xugador fai un pase pal fondu la banda izquierda, que yera la que nos caía cerca. Yo, viendo que la portería punxérenla centradina y por aquello d'integrame nel ambiente espansivu y llinguateru que nos arrodiaba, comenté n'alto:
?¡Tú mira pa ónde la tira! ¡Pal cantu!
Volviéronse, fulminantes, tolos paisanos que teníemos alredor (digo paisanos por aquello de la perspectiva tramposa de la edá, pero igual nun pasaben de los 40):
?¿Tu yes mongol, guaje? ¿Nun ves que ta profundizando pa centrar atrás y evitar l'orsai?
Les miraes despectives de los espertos, que me teníen por diana, bastaben pa engurriame, pero amás taba aquel términu misteriosu, orsai, que yo nunca viere impresu en ninguna de les noveles que me robaben l'adolescencia. Prudentemente, callé la boca. El mio amigu nunca me volvió a invitar a acompañalu, prudente tamién.
Cuento esto per delantre pa que'l lector entienda la mio ignorancia en materia futbolera y me disculpe si pongo alguna barbaridá a continuación. Porque voi referime al universu balompédicu, más en concreto, al asuntu de los Ultra Boys deteníos en Xixón por buscar bronca nun bar onde paraben aficionaos del Unión Club Ciares. Si-y facemos casu a la prensa, puede paecer que llevaben intención de repartir palos, pero, vaya, nun vamos ser mongoles: en realidá, profundizaben pa centrar atrás y evitar l'orsai. Quiero decir que los que los condenen públicamente, esta xente de la izquierda antipatriota y antiesportinguista que vuelve a pedir medíes contra les peñes del fondu sur del estadiu, ye que nun entienden de fútbol, como un servidor. Pelayo Barcia, el director xeneral d'Empléu del ayuntamientu de Xixón, sí. Refiriéndose a los Ultra Boys, declaró va poco na radio: "Les conozco y no es su filosofía". Barcia ye un poeta vanguardista. Xuntar "filosofía" y una referencia a los Ultra Boys nun endecasílabu ye una fazaña estrictamente surrealista, lo que buscaba André Breton cuando propugnaba la escritura automática: sacar a flote lo más onírico del subconsciente y tresformalo en versu. L'endecasílabu declamólu Barcia pol casu de tres ultras que s'arreglaron cola xusticia por participar naquella engarrada del Manzanares de 2014, con difuntu resultante. A los pocos díes de les declaraciones barcianes, pasó esto otro del bar de Cimavilla. Pero, como bien diz el delegaú del Gobiernu d'España, M. Marín, toos tranquilos porque "es un hecho esporádico". Y, como bien razona Fernando Losada, directivu del Sporting, nun se puede castigar a ochocientos xustos por unos pocos pecadores.
Cuéntame Google que, en 2017, pasaron pel cuartón otros diez pecadores por armar follón nel partíu contra l'Oviedo de la primer vuelta d'esta temporada liguera. En 2016 hubo sentencia de dos años y tres meses de prisión contra otru que-y rompió les narices a un vixilante depués d'un partíu contra'l Córdoba, pero la fiscalía pedía cárcel pa siete más. Esi mesmu añu, detuvieron a otros tres por agredir a la policía nun sé si enantes, depués o durante un partíu contra'l Dépor. En 2011, hubo una batalla multitudinaria na ribera del Piles contra "tifosi" del Génova. En 2009, otra engarrada masiva en L'Arena con otros talos del Sevilla. Etc. Dellos de los pecadores que dexaron en coma a Germán, va unos meses, apaecíen en semeyes con miembros relevantes d'Ultra Boys, contaron los medios de comunicación. En fin, si lo de Cimavilla ye un fechu esporádicu, hai que crear una subcategoría nueva: lo esporádico recurrente. Como'l signu de los tiempos ye la decadencia, y a eso nun escapa nin la maldá, los pecadores descienden a les categoríes inferiores y agora entamáronla col Ciares, que milita nuna división mui distinta del Genova o'l Sevilla ("Sic transit gloria mundi!"). Igual ye porque'l Ciares ye un club raru: progre, asambleariu, asturianista, feminista... Tengo entendío qu'hasta tien socios con títulu universitariu, qu'eso debe ser la peor ultrablasfemia. Pero, ¿qué sé yo, si nun entiendo nada de fútbol? A los qu'hai qu'entender ye a los ultras futboleros, los locales y tolos demás, en xeneral, como fai Barcia. N'algo tien que s'ocupar la xente mientres que llega y non una guerra, a poder ser civil, que los faiga útiles. Y, d'otra manera, tampoco procede acusar a los directivos del Sporting de ser cobardes al tiempu de tomar medíes si la grada, en conxuntu, nun da señales de condena xiflando al fondu sur. Pero conmigo que nun cuenten, que yo, pa que me llamen mongol, nun voi al Molinón.
miliorodriguezcueto.wordpress.com
