Nel añu 1976 miles de persones percorríen les cais de Xixón pa reivindicar la entrada del asturianu nel sistema educativu y l'autonomía. Esta manifestación foi la primera que se desarrollaba n'Asturies depués de la muerte del dictador y nella axuntóse prácticamente tola oposición democrática al réxime franquista na nuestra tierra. Aquella movilización que naguaba pola dignificación y normalización de la llingua propia y histórica de los asturianos y asturianes diba convertise nel puntu de partida d'una reivindicación permanente y continuada hasta los nuestros díes. Nesti sen, ye probablemente la cuestión más importante que queda por resolver d'aquel tiempu y que venimos "arrastrando" dende la llamada Transición.
Cuatro décades depués el déficit democráticu que supón la falta de derechos pa toos aquellos que llibremente decidimos emplegar l'asturianu na nuestra vida sigue tando ente les cuestiones pendientes que como sociedá tenemos los asturianos y asturianes. Aplazáu sine die esti asuntu por parte de los representantes políticos mayoritarios na Xunta Xeneral, el cambiu de postura de la FSA nel so últimu congresu abrió la posibilidá real de que d'una vez por toes se solucione'l tema llingüísticu de la manera llegalmente establecida na Constitución: cola declaración nel nuestru Estatutu d'Autonomía como llingua oficial del asturianu (y del gallego-asturianu na so zona). Dalgo que debería abordase dende'l sentíu común, la templanza y la voluntá d'alcuerdu parez ser qu'espertó les peores maneres nuna parte del establishment políticu y unos pequeños grupúsculos radicalizaos de calter reaccionariu.
La oficialidá qu'hai qu'enmarcala cenciellamente como un pasu más na reconocencia de los derechos civiles que nos asisten como ciudadanos y ciudadanes d'esti Estáu. Trátase d'un derechu de calter individual que permitiría que caún o caúna, en base a la so llibertá personal, podría escoyer la llingua a emplegar en cada momentu ensin torgues nin imposiciones. Pero tamién tien una vertiente colectiva, porque tamos falando del modelu de sociedá que queremos, y nós apostamos por ún basáu na tolerancia y el respetu, tamién nel campu llingüísticu. Y ello porque la llibertá nunca ye imposición, los derechos civiles nunca son un gastu y la tolerancia nunca supón enfrentamientu.
El próximu sábadu, dende la Xunta pola Defensa de la Llingua Asturiana, llamamos a participar n'Uviéu (Estación del Norte, 12:00 h.) na manifestación qu'entamamos como muestra d'apoyu a esti patrimoniu común que ye l'asturianu. La entidá convocante foi ideada por persones que veníen del ámbitu cultural esmolecíes pola situación llingüística asturiana (nun primer momentu a inciciativa del escritor Adolfo Camilo Díaz, al que se sumó un xoven Xuan Bello) y na que tuve'l privilexu de participar na so fundación. Ye una organización cívica, apartidista y totalmente independiente, que se sufraga al traviés fundamentalmente de los socios y del trabayu de los militantes. Dende la so creación nel añu 1984 hasta agora desenvolvió munches y mui variaes actividaes (concentraciones, cursos, clases na cai, conciertos, Premios "Andrés Solar", caravanes, marches...), toes elles pacífiques, integradores y tresversales. La diversidá de los sos integrantes ye una bona muestra de la sociedá asturiana y como asociación nun tien nenguna opinión sobre l'estatus qu'ha tener Asturies como suxetu políticu nel Estáu español (o fuera d'él). El so llabor circunscríbese únicamente a la defensa y promoción del asturianu y la so normalización social y al llogru de los derechos civiles plenos pa los y les sos falantes.
Depués de más de cuarenta años de trabayu responsable y exhautivu de bien de sectores (filólogos, escritores, músicos, periodistes, etc.), que fixeron del asturianu un idioma amañosu pa toles necesidaes comunicatives y de creación inherentes al tiempu actual, la nuestra sociedá ta lo suficientemente preparada p'asumir y xestionar con total normalidá la so oficialidá. Por eso, esti sábadu miles d'asturianos y asturianes (de nacencia o d'adopción) vamos volver a manifestanos pola reconocencia llegal d'esti idioma, y vamos facelo col espíritu de 1976, cola esperanza d'un tiempu nuevu, porque representamos lo mesmo que daquella: l'enfotu na llibertá, la democracia y la tolerancia.
