La Nueva España

La Nueva España

Contenido exclusivo para suscriptores digitales

Presidente d'Iniciativa pol Asturianu

Modelos d'oficialidá

La asignatura de Llingua Asturiana como materia troncal pa garantizar un mínimu conocimientu

Salen estos díes nos medios delles noticies sobre'l modelu d'oficialidá que podría plantegase dende los distintos partíos. Ye mui positivo que les formaciones polítiques dean pasos alantre y establezan les sos postures sobre'l modelu d'oficialidá que van querer desarrollar, yá que nesti procesu han ser los protagonistes, por más que dende la sociedá civil faigamos les nueses aportaciones y reivindicaciones.

N'Asturies, que l'asturianu nun fuera oficial supunxo munchos problemes pa los usuarios d'esti idioma y pal desgaste de la propia llingua asturiana y del gallego-asturianu nos cuarenta años últimos. La parte bona ye que pudimos poner en marcha delles midíes, a un ritmu lentu y con un desarrollu insuficiente dafechu, al traviés de la Llei d'Usu del Asturianu de 1998. Esto permitió ver que la demanda de los asturianos y les asturianes, inclusive cuando l'asturianu nun tien nengún valor p'acceder a places públiques (como sí lo tienen, n'Asturies, euskera, inglés o catalán. Sí, esto pasa, anque paeza increyible), inclusive cuando l'idioma sigue cargáu d'estigmes llanzaos dende dellos sectores políticos, inclusive cuando s'obliga a les families a escoyer ente estudiar asturianu y francés (nun territoriu onde espulsamos al exiliu llaboral a tanta mocedá), inclusive cuando se ponen torgues pa usar l'asturianu a empresariáu, asociaciones, ciudadanía... Con too, siguimos viendo que la xente d'Asturies quier siguir usando l'asturianu y quier qu'ésti tenga'l mesmu tratamientu que'l restu de los idiomes d'España.

Poner en marcha la oficialidá ye una cuestión que tien que se consensuar ente tolos partíos, o ente'l máximu númberu d'ellos, pero tien que conocese tamién el marcu constitucional nel que mos movemos.

La Constitución de 1978, la xurisprudencia del Tribunal Constitucional y los distintos modelos d'oficialidá que tán en funcionamientu n'España, dexen a les clares delles cuestiones en trés temes clave:

L'usu del asturianu como llingua vehicular, nin siquier de forma parcial, nun tien por qué se xeneralizar. Anque tendríamos que saber que ye una ferramienta mui útil pa la tresmisión del idioma y que facilita'l deprendimientu correctu del asturianu y del castellán, amás de les llingües estranxeres, facer oficial l'asturianu nun obligaría a ello. Nesti ámbitu, sí hai que garantizar que les families que quieran puedan escolarizar a los sos fíos y fíes col asturianu como llingua vehicular, a lo menos en dalgún porcentaxe significativu de les materies, como yá se fai agora na mayoría los centros con un modelu billingüe d'inglés-castellán voluntariu o como se fai parcialmente nos seis centros pilotos onde neños y neñes de cuartu de primaria estudien unes hores n'asturianu.

L'asignatura de Llingua Asturiana y Lliteratura, en marcha dende l'añu 1984, sí que tien que convertise nuna asignatura troncal, una materia normal del currículu, como establez la LOMCE pa les llingües oficiales. Esta ye la única forma de garantizar un mínimu conocimientu del idioma, tal y como afita la xurisprudencia del Tribunal Constitucional.

Esto nun significa que tenga qu'implantase al día siguiente d'aprobar la oficialidá, pue dir implantándose pelos primeros cursos y dir xubiendo hasta'l bachilleratu. Tamién hai que dicir que partimos cola ventaya de que l'asignatura ta implantada yá agora na mayor parte los centros y con un ésitu considerable.

No que cinca al accesu a la función pública, tamién esisten distintos modelos, dende aquellos nos que se pue acceder ensin conocer l'idioma propiu y se dan unos años pa deprendelu y otros nos que solo unes places tienen como requisitu saber asturianu (estes habríen ser les d'atención a la ciudadanía n'especial, yá que ye la única forma de garantizar el drechu al usu del idioma cola alministración).

Lo que sí paez claro ye que nun se podría valorar col mesmu pesu saber euskera n'Asturies, que saber asturianu. Tampoco estes midíes tendríen que s'aplicar dende'l primer minutu, sinón que tendrán de ser progresives y acordies a la nuesa realidá y posibilidaes, asina como col desarrollu del asturianu nel sistema educativu.

La oficialidá tien muches formes d'aplicase pero toes elles tienen en común la garantía de los drechos de los usuarios. Usar l'asturianu nunca sedrá una obligación, nun siendo pa l'alministración, col oxetivu de garantizar el drechu constitucional a usar l'asturianu a la ciudadanía. Los asturianos y asturianes namás tendrá una ampliación de drechos, pa poder usar la llingua que quieran en tolos ámbitos.

Y nesti camín habríen entrar toles formaciones polítiques presentes na Xunta Xeneral, porque n'otros territorios defenden la oficialidá y el billingüismu equilibráu que se ta reclamando n'Asturies dende va más de cuarenta años.

Compartir el artículo

stats