Mercedes Fernández comparte con Albert Rivera (que namás ve españoles, lo mesmo que'l káiser Guillermo namás veía alemanes en 1914, y ya se sabe cómo acabó la visión) una mesma afición globalizadora, o fraternal, o espansiva, quésiyo. La nuestra protobablista (cada vez gasta más el verbu "ye" y, nun va muncho, hasta-y sentí na radio un masculín acabáu en "-u": ta a un pasu d'académica de la Llingua) dio a entender en Cuadonga que, mirando del PSOE pal llau onde ella pon casa, nun ve PP, nin Foro, nin Ciudadanos: ve, namás, centru-derecha: "Hay que vencer localismos y conseguir el mayor número de representantes de centro-derecha en el Parlamento", reproduxo esti diariu.
El panorama políticu asturianu (y l'español por tierra conquistada, pa da-y satisfacción al grandonismu astur) ye un poco como aquel "viscomte dimezzato", Medardo de Terralba, inventáu por Italo Calvino: fálta-y mediu cuerpu, más o menos. De la parte opuesta al corazón, la derecha, naide sabe nada, nun escuca. Cola izquierda nun hai problema: nin IU, nin Podemos, nin siquiera'l PSOE tienen apuru en reconocese pa esi llau. Pero la derecha yera verde, vieno una vaca y comióla. O, como-y pasó al vizconde demediáu, arrampló con ella una bala de cañón nuna guerra vieya, va cuarenta años, y agora debe andar pel mundu alantre, pegando blinquinos coxos per un país remotu de les antípodes del que nin siquiera Cherines tien noticia.
Cherines niega la derecha porque sabe, cree o gusmia que ye términu políticamente inconveniente, perxudicial: un llamparón. Pero, de la otra banda, ella mesma aparta'l llamparón muncho del centru: pa desacreditar al rival, siempre fai referencia a la "izquierda radical". De manera que'l mapa conceptual de la señora Fernández, pintáu nuna fueya plegada pela metá, enfrenta centru-derecha con izquierda y, tirando pa los márxenes del papel, derecha (perdida nel espaciu-tiempu, ya digo) con izquierda radical. Yo entrúgome cómo llevará, el votante conservador y lésicamente consecuente, esa deserción, esa cobardía nominal de la cabezalera del PP.
Mientres, venciendo localismos según la voluntá cuadonguista de Cherines, Cristina Coto apártase y déxa-y pasu a l'alcaldesa de Xixón, que paez ya candidata autonómica segura: previsiblemente, la única candidata femenina, y eso nun-y va venir mal. Naide daba, a estes altures, un duru por Foro, pero los partíos políticos nun esisten: les persones sí. Y esa muyer, Carmen Moriyón, paez tener el santu de frente. Y ye más esplícita que Cherines cola lateralidá política: protestó-y, n'alguna ocasión, a una entrevistadora que la metía nel bandu de la derecha.
En Cuadonga, Cherines celebraba, col so equipu, l'aniversariu de la campaña "Los miércoles, carretera", que cierren, pamidea, porque tampoco pitó lo que s'esperaba d'ella. Nun trípode, mangaron una especie de cuentakilómetros automovilísticu ampliáu y fotografiáronse alredor d'él: 4383 kilómetros, marcaba'l cartón. El 4 de marzo del 83, el grupu parlamentariu Popular presentaba (¡y de la mano de Minoría Catalana!), en Madrid, un recursu d'inconstitucionalidá contra la reciente llei orgánica que regulaba les elecciones locales cola intención de retrasar les que se diben celebrar en mayu y nes que, n'Asturies, arrasó'l PSOE. Y el candidatu del PP yera Álvarez Cascos Qué malos agurios numéricos.
miliorodriguezcueto.wordpress.com
