Nel conceyu Caravia pasó nos primeros díes de la Guerra un jechu d'armas qu'e pocu conocíu y que vo resumir según los datos que tan en tres llibros y n'un artículu escritu pocos meses dempués del combate por unu que firma J. M., que no sé quién era, pero ta claru qu'era mui del «Bandu Nacional».

El 18 y 19 de xunu segundu de 1936 cuatro guardias civiles de guarnición nel puestu de Caravia, por mor d'una orden del coronel Aranda, dexaren el cuartel p'axuntase n'Uviéu colos más de los sos compañeros de la Comandancia provincial; pero el quintu guardia del puestu, Antonio Moreno Rayo, qu'era guardia segundu, no pudió dir con ellos pos taba malu.

El día 24 (diz J. M.) de xunu segundu allegaren tres miembros d'un Comité de Guerra pa que-yos diera la casa, pero Antonio dixo que no y entós a las tres de la tardi vinieren «unos camiones con milicianos procedentes de Ribadesella -alrededor de unos doscientos-» (según García Martínez, páxina 255), o «una piara de fusileros y escopeteros de la más heterogénea especie, reclutados entre la hez de aquel pueblecillo sonriente y de los otros circunvecinos» (dizlo J. M., qu'escribía en 1937 n'una villa que jalaba pa Franco).

Antonio Moreno enjotóse y defendióse elli solu contra otras cuadriellas que vinían de Sama de Llangreo y Ribesella y que ponieren una ametralladora delantre'l cuartel y tiraren a esti cargas de dinamita.

Sin embargu, el guardia civil cabó por caer esgaldecíu pola calentura y lo cansáu que taba, prendiérenlu y cinco díes dempués afusilárenlu tras un a modu de xuiciu sumarísimu (en 1937 paez que no se conocía el sitiu onde lu enterraren). Según García, caltuvo el puestu del 19 al 24 (páxina 255), pero Pérez Valle escribe que «desde el 22 al 26, disparó contra todo aquel que se acercaba al puesto, hasta que el comité de Ribadesella envió a un grupo de hombres que le dieron muerte» (páxina 187).

Los del Comité de Guerra que mandaren rendise al guardia civil joren, según mos diz J. M., «Emilio Palacios, Manuel Rivero y Francisco Sánchez; recordémosles para execrarlos y para que la vara de la justicia caiga sobre sus cabezas»; esti articulista franquista tamién jabla de «Goyo, el alcalde de Ribadesella», llamándo-y «sinvergüenza», pero unos pocos ringlones más abaxu reconoz que no-y paeció bien que mataran a Antonio Moreno Rayo. Esti no joi l'últimu muertu:

A Francisco Sánchez Victorero, de Caravia y de 25 años, afusilárenlu n'alcárcel xixonesa d'El Coto el 12 d'avientu de 1937; a Manuel Rivero Guardia, de 46 años y tamién de Caravia, pasó-y igual, nesta mesma alcárcel el 5 de mayu de 1938. Cuantu a Palacios, que no sé qué pasó con elli, bía síu heríu por un tiru del guardia.