Ello e que los reyes d'Aragón joren tamién amos de reinos d'Italia muchos siglos, jasta qu'en 1715 Jelipe V de Castilla y IV d'Aragón tien que salir d'esta Península, pero Italia siguió con nós y dempués de 1788 cinco de los soberanos d'España eran nacíos n'Italia: Carlos IV, Napoleón I, Pepe I, Madeo I y Xuan Carlos I (los otros cuatro d'esti tiempu eran de Madrid o San Lorenzo de El Escorial).

Carlos IV era nacíu de Nápoles (1748), Madeo I, de Turín, en 1845, y Xuan Carlos I, de Roma, en 1938 (el so güelu Fonso XIII morrió nesta ciudá en 1941).

Otros dos eran de Córcega, isla de lluenga y costumbres italianas anque hoi tienla Francia: Napoleón I, d'Ajaccio, en 1769 (bautizáu como Napoleone di Buonaparte, Nabolione o Nabulione en corsu, joi rei o a lo menos soberanu d'España del 5 de mayu al 6 de xunu de 1808), y el so hermanu Pepe I, de Corte, en 1768 (joi, amás de rei d'España de 1808 a 1813, rei de Nápoles de 1806 a 1808; bautizárenlu como Giuseppe Napoleone Buonaparte).

Amás, María Cristina de Borbón-Dos Sicilias, nacía en Palermo en 1806, joi reina d'España por mor de la so boda col rei Nando VII en 1829 y rexenta d'España ente 1833 y 1840 porque la so jiya Sabel II era entós una cría.

Carlos III joi duque de Parma ente 1731 y 1735, rei de Nápoles y Sicilia de 1734 a 1759 y d'España de 1759 jasta 1788.

Muchu de tou esto e anecdóticu, pero lo más nombráu e qu'en 1801 Carlos IV, pa qu'el so ernu Luigi di Borbone-Parma (Piacenza 1773, Florencia 1803; reinó como Lluvís I d'Etruria) jora rei d'un llugar curiosu, dio la pergrande Luisiana a Napoleón I de Francia pa qu'esti diera Toscana a Luigi; dos años dempués el corsu vendió Luisiana a Estaos Uníos y esto jezo grande, mui grande, a esta nación.

Como e costumbre española escrebir nel modu parllar del país los nombres de los reyes del mundiu, jágolo asina yo tamién y pásolos al asturianu.

¡Jastasagora!