ÁNXEL NAVA
Acoyéndome a la llibertá de los llectores, voi aldericar col escritu: «Lenguas de uso y lenguas de lujo.» Pame que ye una amuesa del etnocentrismu cultural que desprecia de cotanes a los falantes de llingua asturiana. Vezu que, pa vergüenza de los nuesos mayores, sufre l'Asturies d'anguaño. La refugada oficialidá nun ye imposición nenguna, sinón emparu llegal pa nun tener qu'aguantar agresiones d'esta triba.
¿Esto ye la proteición y respetu que van esfrutar la llingua asturiana y gallego-asturianu, reconocíes como «lenguas» nel futuru Estatutu d'Autonomía?... ¿Ye l'abellu que van danos pa caltener esti bien cultural?... Porque los falantes d'estes llingües minorizaes, discriminaos de mil maneres, podemos ser insultaos nos medios públicos. Pol delitu de falar o escribir nesta llingua que naguamos por emplegar con dignidá.
Escritos talos, que faen risión d'una llingua de comunicación que ye hestórica, pero, magar que nun lo fuere, ye «llingua en peligru de desapaición» pa la UNESCO, tipifiquen l'agresión a esta llingua. Llingua na que falamos, escribimos y vivimos, por derechu de vida que se mos arreniega, los que somos dafechu ciudadanos de segunda: «Hablen ustedes asturiano, o panocho, lenguas que nadie habla», diz esti señor, «y son un lujo en esta España de las autonomías»... O fáiganlo na intimidá, ensin salir de casa pa la vía pública.
Díxolo Blas, puntu redondu. Lo que plasma d'esos prexuicios ye que se faigan dende'l previlexu d'una llingua mayoritaria, oficial, mundial -respetada pol qu'esto escribe y polos que defendemos la igualdá de derechos xurídicos del asturianu- con esa mofla y rensía. Y nun mos queda otra que tragar y callar. Pagar impuestos como paganos. Como los paisanos colos arbitrios a la puerta les villes. Impuestos que valen nesta democracia desigual pa sofitar delles otres llingües de la Península, como'l gallegu, euskera, catalán, valencianu o mallorquín, pero non l'asturianu. O billingüismos del castellanu col inglés, pero non cola llingua del país. Menos unes migayes pa tapanos la boca. Como la llimosna que se-y da a un probe.
El que nun respeta esta llingua como bien cultural, nun respeta la cultura asturiana. Aforfugar, atoxigar hasta que desapaeza esta llingua milenaria, ye un crime contra'l patrimoniu asturianu. ¿Pero, de qué plasmamos, en viendo lo que vemos?... La destruición del castru de Cellagú, pesie a la Real Academia de la Historia, l'abandonu del patrimoniu etnográficu, como esi horru esbarrumbáu de Sietes, del sieglu XVIII, l'esraigonamientu de texos centenarios, o la muerte anunciada de la llingua del vieyu reinu d'Asturies y Lleón, con cartafueyos como'l de doña Toda, del sieglu XIII. Menospreciu consentíu escontra toa norma suscrita pol Estáu Español -Declaración de Derechos Humanos, Constitución Española, Carta Europea de Derechos Llingüísticos, Convención de la UNESCO- cola complicidá de políticos y aplausu de «sensatos y pensantes» castellanofalantes, metanes de la risión xeneral.
Prúyeme tamién agradecer al señor Conde de Latores el permisu que mos da pa falar la nuesa llingua na intimidá del llar que cuantayá nun tenemos. Pero dende'l respetu a la «Heráldica Asturiana» de Sarandeses, a la memoria los mios antepasaos, unos Álvarez de Nava que dalgo tuvieron que ver na creación hestórica d'esti Principáu nel sieglu XIV, y l'amistá cola fotógrafa Elena de la Puente qu'entrambos apreciamos: Na llaceriosa espoliación del castru de Cellagú, en Llatores, solar del so títulu, ¿fizo daqué pa impidir traidoría tala pa la cultura d'Asturies, o aseló na intimidá de so casa?... Como nun lo sé, ye polo que-y lo pregunto. Porque yo nun voi quedar de brazos cruzaos mientres ofienden la llingua del mio pueblu, que ye la mía. Y a muncha honra.
Y agora, una entruga pa los políticos que traten los nuesos derechos llingüísticos como fierro eschamplao. Fái-yosla un artista asturianu que fizo l'amuesa «Llingua Solar», n'alcordanza d'Andrés Solar, escritor del resurdimientu d'esta llingua de nueso, onde participemos 24 artistes asturianos, tantos como hores tien el día. ¿El sol, nesta Asturies futura de la so autonomía, va salir dafechu igual pa toes y toos, o pa unos sí, y pa otros poco...? Como dicía aquel home: "Bonos díes... pa dalgunos".
