ISMAEL MARÍA GONZÁLEZ ARIAS
El día que Dios repartió la intelixencia los de Guipúzcoa llegaron tarde. Ye un chiste típicu de Bibao. Los vascos nun necesiten contar chistes de Lepe. El Lepe d'ellos ye Guipúzcoa.
Diz ún de Guetaria a otru:
-¡Oye, Patxi! ¿Tu sabes lo que costó el Guggenheim?
-¿Qué sé yo? ¿Cuánto?
-Cinco mil millones.
-Bueno, con tal de que meta goles?
La nueva estrella de la política vasca ye de Guetaria. Llámase Aintzane Ezenarro. El partíu d'ella ye Aralar. Nacíu d'una escisión d'Herri Batasuna. Nes últimes elecciones, les de va un par de domingos, sacaron dalgo más de sesenta mil votos. Los meyores resultaos que sacaran nunca. Cuadruplicaron la representación nel Paralmentu, pasando d'ún a cuatro escaños.
Vésela contenta nes fotos a esta rapaza. Pero hai una cosa que, a los que somos de fuera, nos llama enforma l'atención. Aintzane Ezenarro nun tien cara d'abertzale. Tien cara de pija de San Sebastián. O lo que ye lo mesmo, tien cara de ser del PP. Lo que nun dexa de ser una bona noticia. Los dos son partíos nacionalistes. El meyor signu de normalidá que pue dar el País Vascu ye que los pijos, de diferentes ideoloxíes nacionalistes, s'asemeyen.
Toi va cinco o seis años nes fiestes de Begoña. Ye la hora de dir tomar unos txikitos. El campanu de vino de garrafón de tola vida, pero en versión vasca. Facemos ruta de txozna en txozna. O sea, de chiringuitu en chiringuitu. Hasta les doce en puntu, que nel programa de fiestes pon que toca quema de bandera. Tamos al pie de la ría. L'Ayuntamientu tá a doscientos metros. Grupinos d'antroxaos d'abertzales, pañuelín palestín blancu y negru a cuadros, gorra de llana, chupa de pa cuando llueve (y tamos n'agostu) y zapatilles Nike, diríxense al Ayuntamientu a quemar la bandera española. Deben tar contrataos pola propia sociedá de festexos. Tol mundu lo sabe. Pasín a pasu, de txozna en txozna y de txiquito en txiquito, van averándose al Ayuntamientu. La Policía fai como que nun sabe nada. El que tien más cara d'animal, y tol mundu sabe quien ye, tira la primera piedra. Como si se tratara de secundar la lletra del cantar: «el aldeanu tiró, tiró la piedra, tiró. Tiró la piedra y nun la encontró». La Policía fai como que nun se da por aludida. Detrás del aldeanu mazcaritáu una moza con corte de pelo abertzale empieza a gritar una consigna. Tradúcenmela: diz nun sé qué de qu'hai que dalo too pola patria. Nun m'estraña nada. Na casa cuartel de la Guardia Civil pon lo mesmo: «Todo por la patria». L'argumentu de la patria siempre ye mui socorríu pa los que nunca tienen argumentos.
Pasa como un cuartu d'hora. La xente cansa. Nun pasa nada. Una piedrina d'aquí. Un tiru al aire d'allá. La neña que gritaba tá quedando afónica. La prubina poco resiste. Necesita repostar. Pide un txikito al delláu míu. Toi apoyáu na barra viendo los toros dende la barrera. Como voi vestíu de medio pijo de Mieres, de tola vida, mírame con cara estrañada. Medio pijo de Mieres ye con un pijo enteru de San Sebastián. Tovía hai categoríes. Pregúntame la moza:
-Zure Bilbotik ez zara?
Que traduzco más o menos como: ¿Tu nun yes de Bilbao, verdá?
Póngo-y cara de risa
-¿Tu vesme cara de ser de Bilbao?
Miróme d'arriba a abaxo.
-Tienes cara de ser de Guipúzcoa.
Lo que, en fino, yera un insultu gravísimu.
Alcuérdome del corte de pelo d'aquella moza. Toles moces abertzales teníen aquel corte de pelo. Yera xenial. La que yera fea facíala fea a rabiar. La que yera guapa, disimulábalo. D'ehí la sorpresa cola cara electoral d'Aintzane Ezenarro. Dir de pija de Guipúzcoa ye un saltu cualitativu impresionante. Sabe hasta sonreír a cámara. Cola cara d'ascu que teníen tolos sos predecesores.
Voi siguir diendo a Bilbao. Pa siguir de txozna en txozna y de txiquito en txiquito, folgando, que siempre se me dio más bien que nada. Como se diz en vasco: Ezer egiten (faciendo nada).
