La Conseyería d'Educación entamó la iniciativa "La pallabra más prestosa/A palabra máis guapa", na que participaron escolinos de 130 centros d'Educación Primaria y Secundaria qu'escoyeron ente más de 6.500 palabres n'asturianu y gallego-asturianu. Los dos términos favoritos son esguil y paporrubio, respectivamente. Depués d'esguil aparecen cascoxu, esperteyu, Asturies, payares, caparina, esnalar, amagüestu, folixa y gayoleru, mentes qu'en gallego-asturianu van augua, faraguya, chucho, señardá, noite, forniga, andolía, bazurrar y zarapayada. Ente tolos participantes na iniciativa va facese un sortéu de llotes de llibros y cedés, entraes al Parque de la Prehistoria, el MUXA, Centru d'Interpretación de Tito Bustillo y visites guiaes a Llaboral Ciudá de la Cultura.