El 21 de febreru celebróse'l Día Internacional de la Llingua Materna, una fecha pa concienciar sobre la diversidá llingüística y cultural que foi proclamada pola UNESCO en 1999. Asturies nun dexó de llau esta conmemoración y delles entidaes entamaron acciones pa fomentar la diversidá llingüística y la educación multillingüe. La primera de les actividades entamóla'l Conceyu d'Avilés y l'asociación Reciella y celebróse'l 20 de febreru. Foi la representación de la obra infantil de marionetes "La viesca de piruletes", de Caracol Teatro. Más d'un cientu de persones -ente pas y neños- dexaron pequeña la Factoría Cultural pa ver esta representación, que se compón de dos histories; "La viesca de piruletes" y "Musín, musín". Les histories busquen la retranca y el xuegu con situaciones divertíes onde los neños participen y son coprotagonistes al traviés d'unos personaxes mui inocentes y tienros que ponen a prueba'l so inxeniu.
En Candás tamién hubo actividaes de la mano de l'asociación Reciella, que conxuntamente col Teatru Prendes entamó un taller musical n'asturianu a cargu de David Varela. L'actividá celebróse nel Centru Polivalente de La Baragaña y cuntó cola participación de delles decenes de neños que pudieron conocer la tradición musical del país, con instrumentos como'l panderu o la gaita que los mesmos neños pudieron tocar y descubrir.
Per otru llau, el Conceyu de Xixón ellaboró un trípticu pa trabayar colos escolinos y dar a conocer la importancia de les llingües minoritaries d'Europa y la necesidá de nun escaecer la nuestra llingua materna, non en contraposición al castellán sinón en convivencia, porque "Dos son más qu'ún, meyor sumar", como recueye'l lema qu'escoyeron pa esti añu. Nel trípticu tamién pue repasase la toponimia de Xixón y aparez "El cantar del vasu", proyectu qu'entamó un grupu de docentes de l'asignatura de llingua asturiana en collaboración con dellos centros educativos pa fomentar l'usu del nuestru idioma ente la xente más mozo. Otra manera, dende Xixón tamién ellaboraron una guía de llectura n'asturianu pa que tolos neños usuarios de les biblioteques puedan conocer cuálos son los llibros más afayaizos pa la so edá.
L'alumnáu del IES Escultor Juan de Villanueva de La Pola Siero tamién celebró'l Día de la Llingua Materna. Asina, convidaron a participar de la campaña #MotherLanguage, que busca promover l'usu de los idiomes minoritarios n'Internet. Por eso, a lo llargo del día usaron les redes sociales mandándose del asturianu pa responder a cuestiones como "¿Porqué ye importante usar la nuestra llingua n'Internet?", compartir agradecimientos o palabres y frases que-yos presten y traducciones a otres llingües pa llegar a otres comunidaes de llingües minorizaes. Amás, fixeron un videu que pue vese n'Internet nel que falen de la importancia de conservar el nuestru idioma.
