Por cuenta de la celebración de la XXXVII Selmana de les Lletres Asturianes, la Conseyería d'Educación y Cultura entama'l III Certame de Teatru Escolar en llingua asturiana o gallego-asturiano. L'oxetivu d'esta convocatoria, que se fai pa tolos centros de Primaria y Secundaria qu'imparten l'asignatura, ye fomentar l'actividá teatral como modelu d'espresión pa estos idiomes y normalizar el so usu nel ámbitu educativu. El plazu de presentación acaba'l vienres 30 d'ochobre del 2015. Ente toles representaciones recibíes va facese una selección pa participar nuna gala final nel Teatru de la Llaboral de Xixón, que va celebrase'l xueves 5 de mayu del 2016.
