El vienres 2 d'ochobre pasáu, l'alumnáu del Colexu Públicu Versalles, d'Avilés, pudo esfrutar de "Soníos d'Asturies", una actividá musical entamada por Héctor Braga que s'inxerta dientro de l'Axenda Didáctica que la Conseyería d'Educación y Cultura ufierta a los centros qu'imparten asturianu. A lo llargu d'una hora de duración, el músicu enseñó a los escolinos dellos instrumentos tradicionales asturianos como la bandurría empleada polos pastores trashumantes, los membranófonos -tambores, bombos, panderetes y panderos-, los idiófonos -castañueles, tarrañueles, cuchares, botella d'anís y otros instrumentos caseros fechos coles coses que la xente tenía per casa-, y les propies manes, coles que Héctor Braga mostró que se pue facer música.
Depués llegó'l turnu de la gaita de rábil, un instrumentu que lleva'l nome de gaita porque suena igual qu'ella, anque ye un instrumentu de cuerda frotada. Con esta gaita puen tocase hasta temes de AC/DC, como mostró Braga a los escolinos. Acabó la presentación col instrumentu más típicu asturianu, la gaita, nomando les partes y desplicando cómo hai que facer pa tocala. El himnu d'Asturies cantáu pola escuela y acompañáu pola gaita valió pa poner puntu final a la sesión.
