Depués de "Mansín" y "Fina, la parrochina", Carla Menéndez publica "Isidru", protagonizáu pol personaxe famosu del pueblu de Valdesoto (Siero). Trátase del tercer títulu de "Vivir del cuentu", colección con protagonistes averaos a la cultura asturiana. Nesti casi, el llibru fala del personaxe qu'anuncia l'empiezu de les comedies, pero que nesta historia ta tou atristayáu, daqué bien raro nél tan dau a la gayola y a la risotada. El testu ye mui atractivu pa trabayar nel aula cola reciella más nuevo.
-¿Cómo nació la idea de facer esti llibru?
-Dende neña viví les mazcaraes d'iviernu en Valdesoto. Prestábame que los neños y neñes del restu d'Asturies entraran en contactu con esta tradición asina como cola figura del sidru, la so caracterización y el so papel dientro les mazcares y del xéneru de la comedia.
-¿Piensa que testos como esti ayuden a tresmitir a les xeneraciones nueves la cultura asturiana?
- Espero que sí. El cuentu como instrumentu en sí mesmu tien un valir grande, nun sólo pedagóxicu sinón tamién lúdicu. Pémeque ye fundamental atopar una historia bona qu'enganche al llector, que-y llegue. Si xunto col testu hai unes ilustraciones prestoses tenemos un llibru redondu.
-¿Qué papel xueguen les ilustraciones?
-Personalmente creo que ye tan fundamental un testu bonu como una ilustración bona. Una imaxen val más que milenta palabres. Polo que voi deprendiendo pa los neños colos que trabayo, la imaxen ye un recursu básico.
-¿Cómo surdió la idea de la colección "Vivir del cuentu"?
-En 2009 taba preparando les oposiciones a maestra d'Infantil y ocurrióseme. Ye ún de los proyectos que defiendo énte los tribunales añu tres añu y que, gracies a la Editorial Trabe, pude facer realidá. Una colección con histories cercanes y dibuxos fechos con diferentes materiales y testures.
-Pon muncho enfotu en que los sos llibros puedan valir como preseos pa les clases d'asturianu, ¿por qué?
-Creo que si la única intencionalidá ye la didáctica un llibru nun tien sentíu. La lliteratura infantil ye una puerta abierta a un mundu máxicu onde poder esperimentar col llinguaxe, coles emociones, col maxín. Si xunto con éso tamién hai dalgún componente didácticu fenomenal. Sicasí, pa min lo didáctico nun ye lo que prima.
-¿Qué-y comenten los llectores d'Isidru?
-Tengo muncho qu'agradecer tanto a Esther Prieto y Samuel Castro, d'Ediciones Trabe. Tamién al pueblu de Valdesoto y a la so xente, n'especial a Manolo Hevia, Pablo Canal y Pergentino. Arropáronme dende'l primer momentu nel que-yos comenté la propuesta de facer un sidru de "carne y güesu". Los comentarios que me lleguen personalmente y dende les redes sociales son mui positivos, nun puedo pidir más.
-¿Hai proyectos nuevos en camín?
-Claro que sí. Los neños y neñes son la mio inspiración y tengo munches histories que cuntar. Pero too depende de si hai perres o non, pues si puedo espublizar ye gracies a les subvenciones. Namái espero que los proyectos nuevos vos presten.
