La Conseyería d'Educación y Cultura celebra un añu más el Día de les Ciencies Asturianes, que llega a la sesta edición con dos actos científico-divulgativos: un actu dirixíu a la comunidá escolar que vincula'l saber científicu cola estaya meteorolóxica y otru, pa un públicu adulto, sobre la xeoloxía nel paisaxe d'Asturies. Nel casu escolar, va ser el meteorólogu asturianu David Arango, presentador del tiempu na RTPA, el que va tener un alcuentru col alumnáu de Llingua Asturiana y Gallego-Asturianu d'Educación Primaria, Educación Secundaria Obligatoria y Bachilleratu. L'actu va facese'l martes 10 de payares a les 11:00 hores nel Teatru de Llaboral Ciudá de la Cultura (Xixón). L'aforu máxima va ser de 800 escolinos, polo que los centros van tener qu'apuntase y la selección de les escueles va facese por orde de reserva.
Arango, que tamién trabayó en LaSexta, empezó usar el nuestru idioma na información meteorolóxica de RPA hai dalgo más d'un añu. Foi nes noticies de les 13.00 hores de RPA, que se faen dafechu n'asturianu. Amás, nel Día de les Lletres Asturianes d'anguaño presentó, pela primer na historia de la televisión, l'espaciu del tiempu na llingua propia d'esta tierra. Per otru llau, los maestros que tean interesaos en trabayar dalgunos conteníos sobre los temes que van tratase nel Día de les Ciencies, van poder descargar propuestes pedagóxiques na web d'Educastur. Otra manera, l'actu p'adultos va facese na Facultá de Xeoloxía de la Universidá d'Uviéu a les 19.30 hores d'esi mesmu día. L'actu va consistir nuna conferencia sobre'l relieve y paisaxe del nuestru país que va ufrir el profesor Pedro Farias Arquer.
La UNESCO declaró, nel 2001, el día 1 de payares como Día Mundial de la Ciencia pa la Paz y el Desarrollu. La conmemoración quier afalar el saber científicu y les sos aplicaciones concretes, pa favorecer que los seres humanos tengan vides más plenes, dignes y llibres. Con too, nun foi hasta'l 2008 cuando'l Gobiernu autonómicu empezó celebrar el Día de les Ciencies Asturianes, que na primer edición tuvo dedicada al matemáticu Agustín Bernardo de Pedrayes y Foyo (Llastres, 1744- Madrid, 1815), pola so contribución a la implantación del sistema métricu decimal.
