Depués del éxitu ensin precedentes que tuvo la publicación n'asturianu de "Astérix na tierra los pictos", esti 22 d'ochobre va publicase "Astérix y el papiru de César". Trátase d'un volume nuevu del heroe galu pal que van editase un total de cuatro millones d'exemplares en tol mundu, de los que 1.500 van ser nel nuestru idioma. Y ye que l'asturianu ye una de les venti llingües nes qu'Astérix y Obélix van llegar a les llibreríes. Amás, nun vienen solos, porque Distribuciones Terrier y Bruño Salvat tamién va sacar "La foceta d'oru", álbum númberu dos de la colección. Asina y pel momentu, yá se puen lleer nel nuestru idioma cuatro de los 36 títulos protagonizaos pol heroe galu.
Depués d'estrenase con "Astérix na tierra los pictos", obra que na nuestra llingua vendió 2.500 exemplares, nel álbum nuevu repiten Didier Conrad como dibuxante y Jean-Yves Ferri como guionista. Con too, los dos títulos tuvieron la supervisión d'Albert Uderzo. "El papiru de César" va xirar sobre la interpretación de la historia qu'ufren los vencedores y ente los secundarios va haber un personaxe inspiráu n'Assange y un malu nuevu, Promoplús, conseyeru del César y que va tar inspiráu nun asesor de François Mitterrand; Jacques Séguéla.
Per otru llau, "La foceta d'oru" ye l'álbum col que principien les aventures pel mundu d'esti personaxe. Ye'l primer episodiu que trescurre fuera de la redolada de l'aldea y el primeru tamién nel qu'Obélix actúa como co-protagonista, porque en "Astérix, el galu" namás yera un secundariu. L'argumenta de la obra ye qu'al druida Panoramix ruémpese-y la foceta d'oru qu'emplea pa recoyer l'arfueyu, que namás tien poderes máxicos si se corta con una foceta asina. Dientro poco, Panoramix va tener qu'asistir a la xunta anual de druides galos y nun va poder facelo ensin una foceta d'oru. Fabríquenles en Lutecia -metáfora de París-, asina qu'Astérix y Obélix van viaxar a esa ciudá pa consiguir una. Nesti casu, la tirada n'asturianu va ser de 1.000 exemplares.
