El llunes 19 d'ochobre, un centenar d'alumnos y alumnes d'asturianu del IES Aramo y del IES Fleming vivieron una esperiencia teatral bien interesante gracies al grupu Higiénico Papel. Y ye que'l salón d'actos del primer institutu acoyó l'espectáculu "Una hora na cocina", protagonizáu por tres actores, una cocina y muncho humor. La obra xira sobre tres chefs de fama mundial que s'enfrenten nel prestixosu concursu d'alta cocina internacional "La Cocina de Palaciu". Les normes son cencielles: disponen d'una hora pa ellaborar el platu que quieran, pero tienen que xugar llimpiu colos demás concursantes. Sicasí, los cocineros van poner en práctica delles táctiques pa facese cola victoria. Na representación, que ye una iniciativa de l'Axenda Didáctica Escolar de la Conseyería de Cultura, contaron cola collaboración especial de les fotógrafes Alba Eguiluz y Cristina Fanjul, alumnes voluntaries del Ciclu de Iluminación, captación y tratamientu de la imaxe.
