El cómic n'asturianu tien más de cien años, pero hasta'l momentu existió a cuentagotes. Y eso que "Les aventures de Pinín" llegó a publicase en Madrid tando escrito nun amestáu bastante bono. Nun se pue dexar de llau que nos años ochenta nacieron revistes como "El gomeru", na qu'empezaron a publicar xente como Ígor Medio o Javier Rodríguez, qu'agora mesmo ta dibuxando a Spiderman. Tamién participó nesta publicación l'uviedín Germán García, que dibuxó a Superman y que ye una referencia imprescindible del cómic européu. Esti ilustrador publicó en "El Gomeru" el cómic "Trop", que salió por entregues y que se pue topar de forma completa nes llibreríes. L'exemplu ye una muestra de la importancia que tien el cómic pa la nuestra cultura. Por eso, hai que reseñar qu'amás de les traducciones d'Astérix, que tanto éxitu tán teniendo, podemos alcontrar munches más obres, Un preséu bien bono p'atraer a les xeneraciones más moces hacia les nuestres lletres.
Un exemplu son les obres ganadores del premiu "Alfonso Iglesias" de cómic, qu'entama'l Gobiernu d'Asturies. La primera foi "Manzajú", de Ruma Barrero, na que los llectores van ser testigos d'un viaxe al pasáu onde'l protagonista remembra'l tiempu nel que deprendió a conocese a sigo mesmu. L'autor tamién tien nel mercáu "La Chelita. El Salvador 1992". Una novela gráfica a partir de les vivencies y testimonios de cooperantes internacionales y veteranos de la guerrilla salvadoreña y col qu'algamó'l Premiu al Meyor Llibru n'Asturianu de 2012 que concede la Tertulia Malory. Per otru llau, en "Aguantando cachones" recueye en papel les historietes publicaes nel so blog, mentes qu'en "Moyando'l culu" tán una serie de tires pa tolos públicos protagonizaes por un grupu de neños.
Nel 2011 -un añu enantes quedó ermu-, ganó'l Premiu'l dibuxante Isaac del Rivero. Foi con "Dona Berta", una versión llibre de la novela de Leopoldo Alas, Clarín. Esti autor tamién publicó xunto a Juan José Plans "Xovellanos", que narra la vida de la mente más llúcida que dio esta tierra. Mui apropiáu pa escolinos, sirve p'averase a la vida del prócer asturianu y a la historia, costumes y cultura del sieglu XVIII. El "Alfonso Iglesias" siguiente foi pa "Homes", de J. A. Marinas. Trátase d'una novela gráfica na qu'argumentu y ilustraciones anden de la mano pa ufiertanos una obra sobre l'aparición del ser humanu nel planeta Tierra. Esti autor tamién publicó "Ballenes", una historia de l'Asturies costera y los sos barcos balleneros, y la exitosa "Domno", que tien como protagonista al noble Gonzalo Peláez.
La emigración forciada ye la protagonista de "Cuadernu de viaxe", una especie de diariu d'artista cola qu'Alfonso Zapico ganó'l "Alfonso Iglesias" nel 2013. Un añu enantes, esti autor de Blimea fixerase col Premiu Nacional de Cómic qu'otorga'l Ministeriu de Cultura. L'últimu premiu de cómic n'asturianu foi pa Enrique Carballeira, autor de la perconocida tira "Les coses de Nardo y Quina". Sicasí, nesti casu foi con "L'arume de la tierra", onde cuenta la historia de la crisis vital d'un rapaz de 35 años que s'agrava pola so situación de paráu. La mayoría d'estos autores participaron tamién en "Dibuxando un camín", una edición conmemorativa de la Selmana de les Lletres del 2014, que tuvo dedicada al cómic y que tamién salió a la cai en gallego-asturianu. D'equí a poques selmanes un cómic nuevu va unise a esta llista, cuando la Conseyería d'Educación y Cultura dea a conocer a los gallardonaos colos sos Premios Lliterarios n'asturianu, onde tamién va haber un "Alfonso Iglesias" nuevu. Otra oportunidá d'oru p'averase a les nuestres lletres al traviés de les viñetes.
