Los neños y neñes participantes nos talleres d'animación a la llectura que principiaron el vienres pasáu na Casa de la Mocedá de Sotrondio quedaron ablucaos cuando vieron qu'un misteriosu personaxe estrozare una esposición sobre poesía asturiana que se diba inaugurar nesti centru. Depués de la sorpresa inicial, los participantes recibieron les instrucciones de los monitores de Bocina Nalón y de l'escritor Pablo Rodríguez Medina, que-yos propunxeron reconstruir la esposición al traviés del so trabayu.
Yá'l vienres se punxeron manes a la obra y tuvieron trabayando cuestiones como la rima, el ritmu y los caligrames. Tou esti trabayu va siguir desendolcándose'l próximu vienres 13 y el so resultáu va vese'l día 27, cuando se va inaugurar una esposición con tol trabayu fecho por estos neños. Estos talleres formen parte de la programación de les XIV Xornaes de Lliteratura Infantil y Xuvenil qu'entama'l conceyu de Samartín del Rei Aurelio y na que tamién s'incluyen representaciones teatrales pa los centros educativos.
