Deprender que la meteoroloxía ye una ciencia, non dalgo que tenga que ver cola maxa y les boles de cristal, foi una de les coses qu'esplicó David Arango a los escolinos d'asturianu y gallego-asturianu. Y ye que'l meteorólogu de RTPA foi'l protagonista del VI Día de les Ciencies Asturianes, que se celebró esti 10 de payares nel Teatru de La Llaboral, en Xixón. Arango ufrió una charla sobre cómo se fai la previsión del tiempu y esplica qu'a los participantes prestó-yos muncho, "porque namás qu'abrieron la boca cuando fiximos un xuegu nel que-yos dixi que'l teatru yera l'atmósfera y qu'una pelota yera una partícula d'aire". El presentador del tiempu de RTPA afirma qu'anque nun hai un desarrollu de la meteoroloxía n'asturianu, existe muncho vocabulariu nesti idioma, "que munches veces permite esplicar les coses con más matices que'l castellanu".
Per otru llau, Arango comenta qu'empezó a facer la información del tiempu en RPA n'asturianu por iniciativa del periodista Naciu Varillas, "y tengo que reconocer qu'agora ye dalgo mui prestoso". Esplica, amás, que na televisión y coinciendo col Día de les Lletres, van proponer volver dar la información meteorolóxica nel nuestru idioma, dalgo que yá se fixo anguaño. "De xuru que nun vamos topar nengún problema, pero facelo tolos díes ye un tema que nun me compete", afirma.
