Xuan Xosé Sánchez Vicente

Soi un poco tochu

Los ataques al asturianu, que nun se defiende por perres

Hai unos cuantos díes acaben de sonar palabres de guerra contra l'asturianu y los que, además que querer a la nuestra tierra por munches coses, querémosla tamién pol asturianu, la llingua de nós y la de los nuestros mayores (ehí tan, ente ellos, Xovellanos o Marirreguera). Ún de los argumentos que siempre se remana nel ataque ye que los que tenemos esa postura facémoslo pol "negociu", esto ye, por perres.

Debo ser un daqué tochín yo. Dende que saqué la mio cátedra d'institutu a los venti mui pocos años nun sé que me tenga dao munchu negociu l'asturianu. Si acasu, quitando dalgunos premiucos, gastos (menudos, pero gastos, y frecuentes). Y, además, munchu tiempu y munchu esfuerzu empleaos, puertes abondes cerraes por esa dedicación, incomprensiones a esgaya y un balance final de tantu esfuerzu qu'asemeya un migayín al de dar voces en castañéu (pa los propios y pa los ayenos).

Pero, agora que caigo, si tantu negociu ye esto de defender, falar y escribir n'asturianu, ¿por qué nun se meten ellos a esa estaya? Si tan estraes les perres pel suelu, ¿por qué nun vienen a pañales? Nun se m'ocurre por qué.

Y agora que lo pienso, vo tener qu'andar con cuidáu: igual me cae un día una navayada de daquién que quiera apoderase del mio choyu. Nun m'estrañaría: yá dende Horacio sabemos qué dañible ye la "auri sacra fames".

Anque, nel fondu, yo creo que solo lo dicen por faltar. Porque si a dalgún negociu se paez esto ye, más bien, al de Ramonzón de la Panera.

Compartir el artículo

stats