Apaecen na semeya tan satisfechos. En LA NUEVA ESPAÑA del 16/11/2016. Tolos grupos políticos de la Corporación xixonesa, seis, y daqué representante d'Oxfam Intermón. Delantre d'ellos, como'l capote d'un toreru, o como'l pasquín d'un maletilla pidiendo una oportunidá, un cartel. ¿Qué diz el cartel? Que van declarar a Xixón "municipio libre de paraísos fiscales".
A mí, así, de mano, paezme un conxuru, como si declarasen la ciudá llibre d'espíritus malinos pasando l'alicorniu pel agua, o como si la misma declaración, al mou del solombreru que'l cura tira al Ñuberu pa que descargue nél la ñube y non nos campos de la parroquia, espantase los paraísos fiscales pa que nun ficiesen posa en Xixón.
Piénsolo más detenidamente y paezme que ye otru asuntu: la voluntá d'apuntase a cualquier cosa de la moda del beateríu políticu. ¡Pues nun ye nada!: la Corporación de Xixón contra los paraísos fiscales, con tantu pesu como l'apoyu de Sánchez a la Clinton, o como la carta amenazadora de Podemos a Trump; pa meter mieu.
Lluegu camiento que la cosa tien más fondu, qu'esto va na llinia de l'anterior declaración contra les empreses d'Israel ("Ciudá llibre del apartheid israleí", declaró'l Plenu), y empieza yá a esmoleceme esta tendencia corporativa de querer meter el focicu na vida y na cuenta les empreses, a ver con quién negocien, cuálu ye'l so capital o los sos accionistes. ¡Como si les empreses y l'empléu nun tuviesen yá problemas abondo pa que-yos creen otros! Y como si nun tuviesen más sitios pa dir, les que se quieren espantar y les que non.
Pero un caberu refervimientu faime andar per interné indagando, y veo que'l capital de la mayor empresa asturiana, dicen, tien cuentes en paraísos fiscales. Y entrúgome: ¿van char a monte de Veriña a Montiana estos rapazos?
Y entovía s'estrañen de que voten a Trump. ¡Si los voten a ellos!
