La cultura ye la meyor revolución. Seguramente por eso a los gobiernos mediocres y dictatoriales espánta-yos la posibilidá d'un pueblu educáu, cultu, con preparación, con criteriu. Javier Pérez de Albéniz
La cultura, entendida de manera amplia y diversa, dexó de considerase como un lluxu d'unos pocos privilexaos pa convertise nun derechu de toos y toes, lo que conllevó la creación de bien de servicios y programes culturales dende les instituciones públiques, y especialmente dende l'Alministración local. Les sociedaes modernes esprésense culturalmente (bien practicando, produciendo o consumiendo cultura) y ello tien que tar garantizao y promovío polos poderes públicos, qu'han afalar a la participación y asegurar l'accesu. Too ello canalízase y desenvuélvese al traviés de la política cultural, y ye'l marcu local l'escenariu más relevante pa la implementación de la mesma. D'esti mou, l'ámbitu municipal ye l'espaciu más próximu a les necesidaes y deseos de la ciudadanía, polo que ye tamién l'espaciu amañosu pa la toma de decisiones colectives col aquel de resolver les demandes qu'ésta pueda tener, nesti casu de calter cultural. Otra manera, conscientes de la so importancia ideolóxica, los poderes públicos nun se muestren neutrales a la hora de definir y implantar la política o polítiques culturales.
Feches estes salvedaes, alcontrámonos con que, dende qu'Asturies accedió a un estatus de Comunidá Autónoma a mediaos de los años 80 del sieglu pasáu, cola consiguiente creación d'una conseyería específica en materia cultural, les polítiques desendolcaes nesti campu pola Alministración autonómica dirixéronse más hacia la denominada "cultura del espectáculu" qu'hacia la creación de redes locales operatives, estables y qu'afalaren una profesionalización llaboral de los axentes propios nesti ámbitu. Asina los grandes "llogros" depués de toos estos años son una serie d'edificios y infraestructures monumentales que persiguíen más l'autobombu del gobernante de turnu qu'otra cosa, amás del so venceyamientu al sector del formigón y les grandes obres, con tolo que lleva d'especulación, sobrecostes y despilfarru de recursos públicos. Foi una apuesta política evidente: la cultura al serviciu de les grandes empreses del lladriyu, apoyaes poles corporaciones bancaries. Esta dinámica arrastró tamién a les entidaes locales, que n'Avilés alcontró siguimientu y abellugu; nesti sen, les polítiques culturales desarrollaes nestos años na nuestra ciudá dieron más atención a la creación d'equipamientos (que nun primer momentu podía tener cierta xustificación) qu'a favorecer el surdimientu d'un texíu sociocultural autónomu. Esto dio como resultáu unes acciones en materia cultural inxustes cola escena artística y creativa local, escaeciéndose de la estraordinaria capacidá dinamizadora de la cultura, torgando qu'ésta seya útil a la ciudadanía como motor de crecimientu económicu y traduciéndose nel marafundiu de millones d'euros.
Por ello, proponemos un cambiu nel modelu cultural que tenga en cuenta'l valor estratéxicu de la cultura como factor de xeneración de riqueza y desarrollu. Al nuestru paecer, la cultura tien que tresformase nun activu más de la sociedá avilesina que, ente otros oxetivos, tenga como puntos referenciales la medría económica y la creación d'emplegu nel conceyu. Nesti sen los abondantes, carísimos y en dellos casos infrautilizaos equipamientos culturales (nuna ciudá como Avilés, con una población de poco más de 80.000 habitantes, hai bien d'ellos: Centru Niemeyer, La Factoría, Teatru Palacio Valdés, Casa de Cultura, CMAE, Conservatoriu Julián Orbón, Palaciu de Camposagrado, Palaciu de Valdercarzana, Centros Socioculturales de La Carriona, Los Canapés, La Luz, Valliniello y Villalegre) habríen ser tresformaos n'auténtiques factoríes d'idees nueves, de creatividá y d'innovación a los que tola ciudadanía pueda acceder, ensin problemes de nengún tipu, pa construiles y democratizales. Promocionar y favorecer la participación ciudadana ye, ensin dulda, ún de los retos más importantes de les instituciones públiques; pero l'acción política nun ye sólo lo que se fai dende elles, los ciudadanos y ciudadanes y les sos asociaciones y colectivos tienen muncho que dicir. Hai que tener en cuenta qu'empieza a haber una demanda popular pa usar los recursos públicos de manera autónoma, polo tanto, ye necesario entamar modelos de política cultural nuevos, onde prime la proximidá, y nos que la ciudadanía nun seya namás consumidora de la ufierta xenerada poles alministraciones, sinón xestores de les actividaes y espacios comunes.
A esta llinia estratéxica habría qu'axuntar acciones más concretes, como la ellaboración d'un Plan Estratéxicu d'Acción Cultural p'Avilés (coles aportaciones de tolos axentes qu'intervienen na política cultural municipal: técnicos culturales, responsables políticos, asociaciones y empreses, artistes y creadores?) a curtiu, mediu y llargu plazu, nel que s'establezan les bases, ferramientes y intervenciones pa un desarrollu cultural innovador y de calidá; creación d'una marca específica que valga de reclamu y seya consecuencia d'una xestión cultural dirixida al diseñu d'una ciudá creativa y en permanente rellación cola economía local; la reestructuración de la Fundación Municipal de Cultura pa convertila nun organismu de xestión cultural independiente, ensin dirixismu políticu, que fomente la vertebración efectiva del bayurosu texíu cultural avilesín; o apostar pola recuperación de la cai como espaciu festivo-cultural, convertir tola ciudá en suxetu de l'actividá lúdico-cultural y non reducir ésta a los equipamientos destinaos espresamente a esi fin; ente otres munches midíes. Y siempre cola debida tresparencia, optimización de recursos, control ciudadanu y usu equitativu; trátase en definitiva de poner al serviciu de la sociedá, especialmente la más activa nel terrén cultural, los recursos públicos (materiales y d'otru tipu) pa que pueda satisfacer les sos necesidaes nesti campu.
La política cultural ye ún de los elementos centrales de l'acción pública y por ello requier d'una planificación conxunta con elementos d'intervención como l'urbanismu, la política social, la educativa, l'ambiental, etc., col fin de llograr qu'esti espaciu societariu que ye la ciudá seya lo más afayadizu posible. Convirtamos la planificación cultural nun axente de cambiu, de tresformación d'esta ciudá postindustrial nuna metrópoli de la creación y el conocimientu.
