Cuando llegue setiembre too será maravioso", dicía una guapa canción que s'escuchaba hai unes cuantes décades. Pero a poco que pensemos, setiembre ye ún de los meses al que-y tenemos poco aquel y pue non traenos nada maraviosu.
Volvemos al trabayu. Eso sí, los que tienen la suerte de poder volver. Otros tienen qu'entamar nesti mes otra vez a la gueta d'un emplegu dignu, ensin munches garantíes d'alcontralu. Y naide tien ganes de volver al trabayu. El cuerpu darréu s'aveza a la bona vida, a nun mirar el reló, a viaxar y a dir de fiesta en fiesta, qu'hai abondes, tol branu, a lo llargo de la nuesa xeografía. Volver al trabayu diose en consideralo un motivu d'enfermedá qu'afeuta sobre too nel mes de setiembre. Una enfermedá nueva nomada estrés posvacacional. Tamos perdíos. Si trabayamos porque trabayamos, si tamos al paru porque nun atopamos trabayu, l'estrés persigue a la humanidá. Paez un contrasentíu que dempués d'un descansu bien merecíu nun volvamos con rixu pa entamar otra vez col llabor y la rutina de tolos díes.
Y sigue setiembre ríndose de les falcatrúes que nos fai. Los más pequeños tampoco se llibren. Los neños entamen otra vez al colexu, farfullando sobre lo poco que duren les vacaciones, porque paez que cuando se ta de folgueta, el tiempu cuerre más. Sí sí, esto del tiempu ye relativu, ye como si-y prestara facenos rabies y pasa más apriesa o más espaciu según-y peta.
Los neños dempués de dos meses de vacaciones, curties pa ellos ya interminables pa los pas, en setiembre vuelven a la escuela. Otra vez cola mochila cargada de llibros que -yos dexaron a los pas el bolsu temblando, y que-yos estropia la espalda con tantu pesu que tienen que tresportar. Unos cuantos kilos de saber y de perres. Otra cosa ye que too esi saber col que carguen al llombu seya quien a quedase na so tiesta.
Según creyencia popular, setiembre ye un mes caprichosu, seique un pocu retorcíu. O "lleva pontes o seca fontes". Podemos tener unos díes espléndidos nun caer nin una gota d'agua. O si'l Ñuberu nun ta estresáu, como nosotros, pue mandanos bastiazos, truenos y hasta riaes. Güei secar fontes, nun nos afeuta tanto como antaño, porque, de momentu, agua nun nos va faltar en casa.
El sol palidez por momentos. Amáganos la escuridá del otoñu que yá ta al entrar. Los díes son más curtios y nótase. Nun nos queda más remediu que dir día a día mirando a ver si atopamos dalgo maraviosu. Como nos diz la canción d'antaño, nes nueches llargues de setiembre hai más tiempu pa la intimidá y pal amor. Too na vida tien el so llau positivu. Namás hai que buscalu. Seremos optimistes.
