Dende hai unos años el símbolu @ ye pa nós familiar. Los teclaos de los ordenadores vienen cola @ qu'utilizamos n'informática, nes direiciones de los correos electrónicos.
La xente más nuevo, de xuru que se familiarizó col términu @ cola llegada d'internet a tolos llares. Sicasí, la so hestoria ye muncho más antigua y el so orixe vien del llatín. El símbolu de l'arroba yá s'utilizaba a mediaos del sieglu XV.
Caleyando per internet, alcuéntrase abonda información no que cinca al símbolu @. La mayoría de los historiadores acepten que l'orixe de la pallabra "arroba" vien del idioma árabe, del términu "ar-roub", que significa cuartu o cuarta parte. No tocante al símbolu en sí mesmu, esa especie de "a" zarrada per un círculu, dellos espertos sostienen que tien los sos oríxenes nuna práutica ente los encargaos de copiar llibros en llatín, a mano, allá pola Edá Media. Estos copistes utilizaben ", xuniendo con este signu les lletres "a" y "d" pa formar la preposición llatina "ad". Paez abondo lóxicu al tener que copiar a mano cientos de páxines, buscar toles formes posibles d'aforrar trabayu.
Adulces, la @ foi faciéndose popular n'otros ámbitos, y empezó a apaecer nes cartes oficiales redactaes en llatín antes del nome del so destinatariu. Quiciabes podemos tomar esti detalle como precursor de la @ nel corréu electrónicu.
Según dellos historiadores, ún de los documentos más antiguos que se conocen con una @ escrita data del añu 1536. Una carta unviada por un mercader italianu dende Sevilla a Roma, na que se detalla la llegada de tres barcos d'América, cargaos d'ayalgues.
Sicasí, l'historiador español Jorge Romance atopó'l símbolu de l'arroba na Taula de Ariza (de 1448), nel mandáu d'una partida de trigu dende Castiella al Reinu d'Aragón. L' arroba, utilizóse n'España y n'Hispanoamérica como midida de masa, equivalente a la cuarta parte d'un quintal, poco mas de 11 kilogramos y mediu. Pero poco a poco foi desapaeciendo de la nuesa dómina, afitándose dafechu'l sistema métricu decimal.
Cuando l'inxenieru Ray Tomlinson, creador del e-mail en 1971, buscaba un símbolu que sirviera pa identificar les direcciones de corréu, ún de los pocos disponibles nos teclaos y que-y paeció'l más afayadizu, foi xustamente la @ que se convertió asina nel símbolu del corréu electrónicu.
Sin embargu, nestos últimos años, la @ vien utilizándose pa unificar na escritura la referencia a los dos sexos, pa fuxir asina d'un llinguax sexista, pa unificar non solu signu gráficu les formes del masculín y del femenín. Ello a la escontra de lo que diz l'Academia sobre esti usu: "la @ nun ye un signu llingüísticu y, por ello, el so usu nestos casos, nun ye correutu dende'l puntu de vista normativu".
Asina que demientres l'Academia nun diga otra cosa, la @ nun ye una lletra. Habrá que buscar otres fórmules correutes pa desaniciar el llinguax sexista.
