La Nueva España

La Nueva España

Contenido exclusivo para suscriptores digitales

Filazón

Bollos

Los sabores de la infancia queden grabaos na memoria y nun se borran enxamás

Tamos tovía saboriando la fiesta'l Bollu como aniciu de de la primavera. Bollu dulce tan rico qu'inunda Avilés d'arumes y de sabores dulces. Sicasí, cuando siento la palabra bollu, viénseme a la cabeza'l bollu preñao con un chorizu dientro, o con un güevu, bollu pol que naguábemos cuando yera neña y na mio casa amasaben el pan, o cuando amasaben en casa de dalgún vecín, que solíen facenos el bollu pa los neños del pueblu. Agora tamién lu como cuando m'apetez, anque seya de panadería.

Aquellos sabores de la infancia nun se borran nunca. Queden grabaos na memoria como otres tantes coses.

Amasar el pan yera too un ritual. Lo primero dir buscar la lleña p'arroxar el fornu. Nun valía too, hasta pa eso hai que ser esperto, como nel llabor d'arroxar, qu'hai que saber cuando'l fornu taba a punto pa cocer el pan. Llueu ver si'l formientu taba bien y si nun lu había, pidíase prestao en casa d'un vecín o en casa d'un familiar. Dempués d'amasar sacábense dos formientos, ún pa casa y otru pa devolver.

La fornada de pan duraba más d'una selmana, pan qu' al final taba un poco o un muncho duro, y por veces hasta se ponía magorientu y namás valía pa echalo a les pites. Si nun legaba'l pan hasta'l día previsto p'amasar pidíase una fogaza de pan prestao, igual que se facía col formientu.

Tengo na memoria, como una estampa pintada, la imaxe de mio güela rezando después d'enfornar el pan pa que saliera bien. Y¡cómo s'enfadaba si nos ríamos o nun rezábemos cola seriedá que se merez el ritual! Echábanos de la casa'l fornu, "en pecáu mortal", como nos dicía ella. Anque aquello fueren namás les rises de la infancia y de l'adolescencia qu'enxamás vuelven a ser tan intenses.

Cuando ya salía'l pan, encomenzaba'l banquete. Los neños comíamos el bollu preñáu, y un cachín d'aquel rapón de dos clases, ún de cebolla y tocín y otru de tocín y chorizu. Los dos riquísimos.

Les coses fueron cambiando n'aldea, por una parte pa meyor, y por otra perdimos aquellos sabores tradicionales y la fiesta que yera pa nós el día que salía'l pan. Non tanta fiesta pa los que teníen que facer tol llabor. Agora pasa'l panaderu pela puerta y anque'l pan seya distintu, por nun tener aquel trabayu d'amasar, arroxar y toles llabores qu'ello traía emparexao, mércase'l pan y los bollos preñaos y acabáronse tamién los rituales y rezares alredor de la fornada.

L'ello ye que bien el Bollu de Pascua o'l bollu preñáu siguen formando parte de les nueses delicies culinaries y podemos saborialos cuando nos apetez.

Y p'acabar, esti sonetu-homenaxe al Bollu d'Avilés.

Airosos, elegantes y esponxosos

espierta'l sentíu gustativu.

Y na fiesta acompañáu del vinu,

saboriamos momentos mui sabrosos.

El so color intensu, amarillentu

revisti Avilés de galanura.

Como si fueran flores na mestura,

esparde'l so golor, perfuma'l vientu.

Dichosos los paladares endulzaos

que saborien esta pieza maxistral

con arumes d'almíbare, escarchaos.

Quién pudiera barnizar col so dulzor,

tolos díes del añu avilesín?

¡Quién pudiera saboriar el so sabor!

Compartir el artículo

stats