La Nueva España

La Nueva España

Contenido exclusivo para suscriptores digitales

Escritora

Vaqueiros

Un grupu arguyosu de la so forma d'entender el mundu

Nun tuvi presente nel primer Foru de la Cultura Vaqueira (ou vaquera) celebráu n'El Pividal (Salas), ya bien que me prestaría, pero nun pudo ser. Foru al que taben invitaos estudiosos, escritores ya otros representantes de los vaqueiros, esmolíos por falar de la so cultura. Un grupu d'homes, ya unes poques muyeres, chenaron cola so presencia estes xornaes que de xuru s'asemeyaron a un filazón a lo grande.

Aconcéyase esti primer foru de la cultura vaqueira pa falar d'esti grupu que conforma, colos demás habitantes d'Asturie, una unidá cultural, con muitos puntos en común ya con poques diferencias, sicasí bien valoratibles.

Estrañóme abondo que l'Ayuntamientu de Valdés nun tuviera presencia nel citáu foru, pues yía un conceyu con munches brañes ya onde ta viva, perviva, la cultura vaqueira, xuncida, eso sí, cola cultura xalda, más que nada porque nun hai grandes diferencies. Too ye cultura asturiana, cualquier manifestación venga de vaqueiros o de xaldos contribúi al sou arriquecimientu. En Valdés, como n'otros sitios, hai vaqueiros de muitu rangu, grandes personalidades nel mundu tanto de los negocios como del cine, la música ya, en xeneral, nel mundu del arte ya de los deportes, nel mundu de la ciencia y en toles estayes sociales, amás de los que siguen viviendo nes sos brañes, manteniendo con arguyu la so identidá ya la so forma de facer les coses, calteniendo les tradiciones. Ye de resaltar el papel de la muyer na tresmisión de cultura. Poro, les muyeres, vaqueres ou xaldas, tenemos muito que contar nestos nuevos filazones.

Soi una muyer xalda, pero viví rodeada de vaqueiros ya vaqueras, ya viví siempre empapada de la so cultura que yera mui parecida a la mía. Si me pongo a pensar cuasique nada tengo qu'estremar. Salvo qu'ellos practicaben la trashumancia y los xaldos taben siempre nel so llugar d'asentamientu. Tamién ye verdá que yá na década de los 60-70 nes brañes de la parroquia de La Montaña, onde yo me crié, pocos vaqueiros facían trashumancia. Yá taba ellí en retrocesu esta práutica.

Sicasí, na mia casa siempre se faló del poco roce ente vaqueiros ya xaldos. Tamién se falaba d'estes coses naquellos filazones nos que los nenos tábemos sollertes pa escuitar cuentos, ya si yeren "picantes" inda poníemos más la oreya. Falábase de costumes, ya de coses d'unos y otros, de los matrimonios ente vaqueiros, afeutaos, por cierto d'una gran endogamia. Al respeutu, tuvi la paciencia de mirar los llibros de la ilesia de la parroquia de la Montaña a lo llargo del sieglu XX, ya pudi comprobar qu'hubo un 14% de matrimonios mistos, teniendo en cuenta que seríen inda más, porque allí mamás tán rexistraos los de les moces xaldes o vaqueres que firmaron matrimonios mistos na ilesia de Belén. Los mozos (vaqueiros ou xaldos) que buscaron muyer fuera de la parroquia tán rexistraos n'otra ilesia. Les coses fueron cambiando pa bien ya güei l'amor axunta a vaqueiros ya xaldos ensin nengún tipu de prexuiciu.

Nunca lo viví, pero mia buela (1990-1971) contaba cómo nel campu Belén había un sitiu pa los vaqueiros y baillaban en llugares separaos los vaqueiros y los xaldos. Sin embargu, siendo yo mozuca yá nun esistía esa separación d'espacios. Tamién había separadizu na ilesia de Belén, hasta l'arreglu que se fixo nel 1953. Quitóse entós la raya que los arrequeixaba na parte d'atrás del templu. En delles ilesies asturianes inda ta la llinia "prieta" que nun podíen trespasar los vaqueiros.

La Ilesia foi una de les instituciones qu'exerció discriminación con esti grupu, paez ser que por motivos económicos, pola mor de que los vaqueiros vivían un tiempu nes brañes d'iviernu y otres temporaes nes brañes de branu, y dizse que nun yeren bonos pagadores del diezmu. Amás paez ser que nun yeren mui prauticantes, namás nes fiestes grandes facíen actu de presencia na ilesia, ya nun m'estraña nada, dempués de nun poder travesar la barrera que teníen puesta.

Muncho s'escribió sobre los vaqueiros ya la so idiosincrasia, estudiosos como Acevedo Huelves, María Cátedra, Adolfo García o Ramón Baragaño, ente otros, llevaron a cabu importantes investigaciones. Sicasí, el so orixe siempre foi motivu de distintes hipótesis. Paez ser que lo que los distingue de los xaldos ye precisamente el prauticar la trashumancia con tolos sos enseres, ya la condición d'arrieiros ya comerciantes con otres provincies españoles. Esta condición foi conformando una forma de ser ya d'entender el mundu que los fixo un grupu diferenciáu, o polo menos nel que se quixeron ver diferencies culturales, quiciabes alimentaes por otros condicionantes sociales.

Bono ye entós tolos momentos de xuntura que nos lleven a les meyores rellaciones y a afondar y preservar tolos elementos culturales que se dan nuesa tierra.

Compartir el artículo

stats