Prúyemos un pueblu llibre /
que nome cola so voz /
los sos collacios y el pan.
Prúyemos un pueblu llibre /
y una Asturies dixebrá
Andrés Solar
La xornada que festexamos güei pue ser una mui bona oportunidá pa reflexonar sobre qué papel xuega o ha xugar l'asturianismu políticu nesti sieglu XXI. Conmemórase'l 8 setiembre (supuesta fecha na que se desarrolló la batalla de Cuadonga, que dio orixe al Reinu Asturianu) desque s'institucionalizó como Día d'Asturies en 1984, pero había y hai otres feches posibles enllenes de simbolismu y historia.
El propiu movimientu asturianista propunxo nel so momentu'l 25 de mayu, pa facer alcordanza de la declaración de soberanía de la Xunta Xeneral nel añu 1808, mientres la invasión francesa; esta institución unvió embaxadores a Inglaterra pa pidir ayuda y amás creó la bandera asturiana que, practicamente igual, ye la que conocemos güei. Otra posible data, más contemporánea, bien podría ser el 24 d'agostu, cuando se crea'l Conseyu Soberanu d'Asturies y Lleón en 1937, presidíu por Belarmino Tomás, qu'emitió moneda y llegó a dirixise a la Sociedá de Naciones (antecedente de la ONU).
Feches pa valorar lo que los asturianos y asturianes fuimos, somos y queremos ser como colectividá humana diferenciada, na que los que tenemos y defendemos una visión nacional de la mesma hemos de repensar el nuestru papel nella y "refundanos" como movimientu pa facer llegar les nuestres propuestes axeitaes a les sos necesidaes y acordies al tiempu actual.
País
El llinguaxe va ser perimportante nel procesu constituyente que va acabar entamándose nel Estáu español y, como yá asocedió en 1978 cola aprobación d'una Constitución que diferenciaba ente "nacionalidaes y rexones" (coles consecuencies que tuvo), vuelve a ser fundamental la denominación que se-y dea a esta tierra.
Hemos de popularizar ente la sociedá asturiana y los sos representantes políticos la referencia a Asturies como país, faciendo por qu'escaezan términos como "provincia" o "rexón", que conlleven una ideoloxía mui concreta alredor del conceptu d'Asturies. Estos nomes escuenden detrás d'ellos l'aceptación de subsidiariedá, cuando non de sumisión, y qu'hasta'l propiu Estatutu d'Autonomía en vigor descarta, al referise a Asturies como una "comunidá histórica". Provincia ye un términu en desusu, puramente alministrativu y que despersonaliza a Asturies; rexón, anque podría ser un términu xeográficu neutru, nel contestu políticu actual del Estáu español, implica ser de "segunda división".
Debemos popularizar l'emplegu d'una terminoloxía que visualice a Asturies como un marcu específicu d'acción, un suxetu directu pa la praxis política. Propugnemos la utilización sistemática y con normalidá d'un términu con una tradición mui amplia na nuestra historia cultural, social y política como pue ser "país" y que yá dende Xovellanos vien siendo recurrente pa falar de la realidá asturiana.
Asturianismu
L'asturianismu contemporaneu tien cuarenta años y ye la historia d'una frustración. Si bien a él débese'l cambiu na manera d'entender Asturies y punxo en valor les denominaes "señes d'identidá" pa construyir sobre elles l'actual Comunidá Autómona, nun foi quien a llograr un espaciu políticu que pudiere incidir directamente nes instituciones (pesie a l'asunción de parte del so discursu pola sociedá asturiana). Namás en dos ocasiones algamó una ínfima representación na Xunta Xeneral: en 1991 con Coalición Asturiana y en 1995 col Partíu Asturianista.
La situación del asturianismu políticu anguaño vien marcada pol so replanteamientu estratéxicu, como consecuencia de la debilidá que muestra. Con una Andecha Astur meramente testimonial, un asturianismu residual en Foro Asturias y una Izquierda Asturiana baxo mínimos (coaligada con Izquierda Xunida), la mayor parte del mesmu ta na órbita de Podemos Asturies, individual y colectivamente (Compromisu por Asturies). Otra manera, tamién se tán produciendo cambios y novedaes dende la militancia más moza y l'ámbitu de la sociedá civil: una iniciativa como Lluchando pola soberanía, surdida alredor del Centru Social Autoxestionáu La Llegra d'Uviéu, axunta a un númberu curiosu de rapazos y rapaces con ganes de trabayar a nivel de cai y poder convertise, nel futuru, nun referente de tol asturianismu políticu d'izquierdes.
La idea fundamental de los que nos decantemos por integranos en Podemos Asturies ye sacar al asturianismu del ostracismu nel que cayó nestos años d'atrás, visibilizar les sos propuestes públicamente y intentar influyir nel tiempu nuevu que s'avecina. Trabayar con persones de trayectories polítiques mui distintes, procedencies xeográfiques estremaes, sensibilidaes llingüístiques diferentes... tien que valinos como esperiencia p'ampliar la nuestra base social. Pero enantes fai falta un llabor pedagóxicu y divulgativu de qué ye lo que proponemos; hemos de demostrar que, dende la nuestra coherencia y ensin arrenunciar a los nuestros principios, somos quien a entendenos y collaborar con un sector considerable de la sociedá asturiana. L'apueste, de momentu, ta siendo positivu pero faise necesario coordinase, apautar propuestes y facese ver como un grupu compactu y firme na defensa de los nuestros oxetivos.
Soberanía
El conceptu de soberanía na actualidá bien poco tien que ver colo que s'entendía por ella nos sieglos XVIII, XIX y XX. La definición inicial del términu tien el so orixe nos pensadores lliberales; en 1762, Rousseau publica "El contratu social", nel qu'afirma que la soberanía reside nel pueblu (soberanía popular), pela so parte Montesquieu establez que la soberanía pertenez a la nación (soberanía nacional). El casu ye qu'ésti conceptu evoluciona colos tiempos. Tanto nel Derechu Internacional como na teoría política, el so conteníu y definición cambia según el momentu históricu que se tea viviendo. Y poles tresformaciones xeopolítiques, la globalización, les empreses multinacionales, la interdependencia ente les naciones, la cooperación internacional, ye difícil definir na actualidá qué s'entiende por soberanía.
Los que somos partidarios d'aplicar esti conceptu a Asturies debemos esplicar por qué, cuála y pa qué queremos la soberanía, más cuando nesti momentu fálase d'ella non tanto en fundamentos étnicos (llingua, cultura, etcétera) sinón más bien aplicada a la idea de ciudadanía.
Vamos hacia sociedaes multiétniques, plurinacionales, polirelixoses, llingüísticamente variaes... Hai que tener en cuenta toos estos factores y facer ver que la soberanía que propugnamos nun ye otra cosa qu'afondar na democracia, qu'acercar el poder a los ciudadanos con tolo que conlleva (mayor control sobre los sos representantes políticos y los sos recursos económicos, por exemplu). Trataríase d'una tercer vía ente Rousseau y Montesquieu, onde'l pueblu y la nación seyan soberanos.
Piesllu
País, asturianismu y soberanía son tres exes sobre les que trabayar p'algamar una sociedá más llibre, xusta, democrática y abierta. Ye'l retu que tenemos per delantre los que nos sentimos heriedes y partidarios d'esti pensamientu políticu.
