El mes d'abril aníciase tolos años el mesmu día de la selmana que'l mes de xunetu, esti añu cayó en sábadu, y tamién entama'l mesmu día que'l mes de xineru nos años bisiestos. Como paez que ye un mes un poco envidiosu, acaba'l mesmu día de la selmana que'l mes d'avientu. Esti añu será domingu.
"Quién me ha robado el mes de abril", asina diz la canción de Sabina. Yo más bien diría quién me robó tolos abriles que cuasique nun los vi pasar. Y eso mesmo pensaréis munchos de los que lleáis esti artículu.
Cuando nos referimos a los años ye costume dicir "tien quince abriles" o "venti abriles" y qué bien suena. Según vamos cumpliendo, yá nun suena tan bien: 50 abriles, 60 abriles, 80 abriles... yá nun suena tan bien. Coses de la edá. Más bien dicimos: 50 tacos, 60 tacos, 80 tacos. Sicasí, seya como seya, cumplimos abriles ensin remediu porque'l tiempu nun se detién. Y qué rápido pasen los abriles. Lo importante ye que la lluz cola que nos alluma'l mes d'abril podamos disfrutalo munchos años, anque yá seyan "tacos", y que sintamos siempre cantar el raitán cola mesma ilusión.
Dellos de los grandes de la canción dedicáron-y sones a esti mes de primavera. Canciones que son perguapes y capaces de facenos vibrar. Debe ser porque la primavera fai vibrar a tol mundu; de xuru que muncho más a la mocedá, pero 'l rixu primaveral aféutanos a toos ensin remediu. Lo mesmo a los de 20 abriles qu'a los de 60 tacos. Canciones, color y calor, claridá y lluz alimenten la vida nesti mes d'abril. Viénseme a la memoria la perguapa canción "luna de abril" de Carlos Cano que cuando la sentimos dispárense les endorfines y percuerren el sangre. Seique tenemos que facenos ecu de lo que nos diz la canción: Abril pa vivir, abril pa sentir, abril pa suañar.
Sicasí n'abril podemos tar preparaos pa sentir y pa suañar y tamién pa pillar una moyadura en cualquier momentu porque, como diz el refrán, "n'abril aguas mil". Amanez un día de cielu azul y nun tris apaecen les nubes, que como si-yos afeutare'l rixu priamveral lleguen dispuestes a echanos agua a xarraos. Asina ye la primavera. Abril pa sentir, abril pa pillar una moyadura y eso sí, abril pa suañar.
