Estos díes el fou tiennos atemorizaos. Estremecémonos cuando nos ponemos na piel de los que nun pudieron, nin puen escapar de les llames en Portugal, en Londres y en tantos otros puntos que sufren les quemes nos meses de branu. Mañana les fogueres na nueche de San Xuan traeránnos a la cabeza'l fou que ta abrasando tantos llugares. Dolor y muerte que nos van a escurecer esta nueche máxica na que'l resplandor alimenta les ansies de lluz, y el fou tien un significáu purificador.
Seya como seya'l fou cobrará protagonismu na nueche de San Xuan, porque la vida sigue. El fou y l'agua, dos elementos pa celebrar el solsticiu del branu. Quemaremos los trapos vieyos y tolo que nos sobra por casa. Disfrutaremos quemando los sin sabores y tristures que nos enfríen pol añu'l corazón. Y al empar pidiremos deseos de salú, suerte, amor y otres bondaes.
Les flores son otru elementu que nun falta a la cita. Con flores enramamos les fontes. Una costume que vien de mui antiguu y que tien llugar en munches cultures. De xuru que les xanes saldrán a contemplar la guapura y de pasu a garrar la flor del agua pa poder disfrutar otru añu más del encantamientu. Tamién saldrá'l cuélebre, y el basiliscu, la guaxa y les bruxes. Saldrá'l sumiciu, el papón, el pataricu, l'home l'untu y el trasgu pa revolvelo too y escondenos les coses más apreciaes. Y toos beberán del agua máxica cumpliendo asina col ritual.
Hasta hai unes décades, con un ramu de flores enllenes de rosada yera costume engalanar puertes y ventanes pa llamar l'atención de les moces, como seña d'amor. Un ramu de flores na puerta casa o colgaes nes ventanes y balcones, llevaes espreso pol galán, y que la moza entendía como niciu de pidimientu de rellación. Munchos mozos a lo llargo'l tiempu quedaron atrapaos pa siempre nos brazos d'aquel ramu, que nun s'amostiaba col pasar de los díes, anque, de xemes en cuando, se pincharen entrambos namoraos con dalguna qu'otra espina, porque siempre se cumple'l refrán: "Nun hai rosa ensin espines".
