Munchos son los asturianos que nun entienden por qué una bona parte de la ciudadanía catalana tien decidío que lo meyor pa la so tierra ye constituyise nun estáu independiente qu'asuma toles prerrogatives qu'éstos tienen. Ye bien difícil fuera de Catalunya esplicar lo qu'ellí ta pasando; los tracamundios, manipulaciones y falsedaes propiciaes pol establishment políticu y mediáticu nun permiten un debate serenu y rigurosu sobre esti asuntu. La gran pregunta a facer en too esti enguedeyu sería: ¿qué puede ufrir l'Estáu español a toos esos catalanes que nun momentu dau decidieron desconectar (primero sentimental y agora alministrativamente) d'él?
Faise mui difícil presenta-yos un ambiente atractivu y acoyedor como alternativa. Y ello porque al anticatalanismu irresponsable promovíu poles élites polítiques españoles nes últimes décades, presentándonos a los catalanes como insolidarios, egoistes y escluyentes, xúntense les actitúes poco respetuoses pa coles singularidaes nacionales de los territorios onde los partíos d'ámbitu estatal cuenten cola mayoría social.
Nello Asturies ye un exemplu paradigmáticu, un espeyu onde Catalunya ve lo que supón ser gobernaos por políticos d'obediencia centralista. Dende'l cambiu de réxime políticu d'una dictadura a una monarquía parllamentaria Asturies tuvo gobernada pol tándem PSOE-PP (ésti nun espaciu de tiempu curtiu), pasando de tener Gobernador Civil de la Provinvia d'Uviéu a Presidente del Gobiernu del Principáu d'Asturies escoyíu pola Xunta Xeneral. Y anque nominativamente hai una distancia bultable ente ún y otru, la verdá ye que la clase política asturiana nun supo o nun quixo aprovechar fondamente toles posibilidaes qu'abría'l nuevu réxime autonómicu, siempre roceana a establecer un mínimu poder asturianu y puxar por una conciencia de país. El mal entendíu internacionalismu de la izquierda y el centralismu de la derecha fixo que l'autonomía asturiana s'organizare ensin autonomistes de verdá. Foi más un adaptase a los "nuevos tiempos" qu'a creyer realmente nella como una ferramienta tresformadora socialmente y recuperadora de la identidá d'esta tierra.
Como consecuencia de too ello padecimos un menospreciu, cuando non un maltratu, reiteráu a la cultura y la llingua asturianes, y ello pese a tener un movimientu permanente, cohesionáu y cívicu en defensa d'elles (más de cuarenta años d'actividá avalen la seriedá y importancia, por exemplu, de la reivindicación de la oficialidá del asturianu). Incúmplese sistemáticamente la mínima normativa existente sobre esta materia, ehí ta una Llei d'Usu del Asturianu que ye más papel moyao qu'otra cosa, aprobada por unos políticos que nun se sienten interferíos poles lleis qu'ellos mesmos ratifiquen. Callaos como afogaos ante les manipulaciones de la nuestra realidá llingüística o histórica que se da nos llibros de testu que s'estudien nos colexos y institutos de la nuestra tierra, onde al asturianu ("bable") preséntaselu como un simplayu dialectu del castellanu y a la batalla de Cuadonga como l'orixe d'una España única y eterna y non como la nacencia del Reinu Asturianu (eso sí, depués ofiéndense pol supuestu "adoctrinamientu" que dicen se ta dando nel sistema educativu catalán). L'abandonu del nuestru patrimoniu arquitectónicu, con xoyes como l'Arte Asturianu (Prerrománicu) o les nuestres construcciones tradicionales (horros y paneres), ye evidente, cola disculpa de falta de recursos, anque nestos años sí los hubo pa Llaborales, Niemeyers o Palacios de Congresos. Tenemos l'índiz de crecimientu demográficu más baxu de toa Europa y nenguna política concreta qu'interte revertir esta situación, con una perda de población xóven por cuenta de la emigración (miles de rapazos y rapaces marchen añalmente a la busca de trabayu a Madrid o Londres, ente otros llugares) que la agrava tovía más. Promocionen un Paraísu Natural y tenemos ún de los medioambientes más esfarrapaos pola contaminación atmosférica, presentándonos como incompatibles la permanencia de les empreses (puestos de trabayu) y un aire llimpiu. Inoperantes pola deslocalización paulatina del sector industrial (sí, d'equí tamién tán marchando les empreses) y cómplices de la perda del nuestru sector financieru públicu (lo que fixeron con CajAstur nun tien nome). Y yá pa "poner el ramu", tenemos a un presidente refractariu dafechu a la comparecencia pública y a la rellación colos medios de comunicación, más pendiente de cuestiones internes de calter partidista (PSOE) y esternes (Catalunya ye la so gran obsesión) qu'a pensar y actuar nel beneficiu y porvenir d'Asturies.
Mal, pinta mal, si pensamos que los independentistes catalanes van refugar les sos postures si se miren nel espeyu d'Asturies d'estos años d'autonomía gobernada por partíos centralistes. Un movimientu secesionista, por cierto que ta faciendo rescamplar la falacia d'una democracia española que permite ser republicanu o independentista siempre y cuando nun quieras facer realidá esos deseos.
