Nesti outoñu que yá ta al acabar pa dexar pasu al iviernu, foise un amigu míu, al que siempre-y tuvi gran aquel y anque nun lu visitare de contino, yera d'esos amigos que tienen un requexu especial nel corazón, y que lu siguen teniendo dempués de la partida.
Ramón de Las Vallinas foise n'outoñu, como árbol que poco a poco va perdiendo'l verdor, como árbol que va amostiándose dempués del rixu primaveral qu'a Ramón siempre lu acompañó na so vida.
Ramón yera una d'eses enciclopedies orales apinaes de sabiduría popular, de les que darréu van desapaeciendo n'Asturies, llevando consigo una parte importantísima de la nuesa cultura.
Nun pudi tar na so despidida y por eso quiero qu'esta Navidá reciba estes llinies como sinceru y pequeñu homenaxe, n'agradecimientu a la so amistá y a les guapes tardes que pasé con él y la so muyer, Amelia, tamién fallecida, empapándome de sabiduría popular.
Seique agora él será una d'eses lluces qu'allumen el Pastu Mauriciu, n'El Muru. Una d'eses lluces que, misteriosamente, dende cuanta yá, allumen el camín nesi llugar, según nos diz la lleenda que Ramón me contó tantes veces col entusiasmu y la gracia que lu carauterizaba. Col entusiasmu que me contó munches otres coses que formen parte de la nuesa forma d'entender el mundu.
Llegar a casa de Ramón y Amelia yera como llegar a la mio propia casa, pol cariñu y amabilidá cola que me recibíen. Sabía a qué hora llegaba, y nun me llegaba nunca la hora de marchar.
La muerte de seres queríos súmenos nel dolor. Nun somos a asumir que cuando nacemos ya traemos fecha de caducidá. Los familiares tienen que pasar el duelu, pero siempre consuela pensar que dempués d'una vida fecunda de trabayu, d'entrega y bondá, Ramón brilla agora como una estrella n'otra dimensión.
Na so memoria, y dedicada a la so familia, esta lleenda que prestosamente recibí del so baúl de sabiduría y que, nel so día, publiqué nel llibru " Lleendes y otros aspeutos máxicos nel folclor de Castrillón", por ciertu, agora agotáu, pero de próxima reedición.
Les lluces d'El Pastu Mauriciu
La lluz siempre tuvo daqué máxicu na cultura popular. Hai munchos dichos, cuentos y lleendes nos que la lluz ye protagonista. La lluz ye vida y allegría, pero tamién n'ocasiones ta asociada a la muerte, al otru mundu, a lo desconocío?
Los vecinos d'El Muru y de Las Vallinas (Castrillón), nun alcuentren esplicación pa un fenómenu estraordinariu que bien socediendo dende cuantayá, nel Pastu Mauriciu. Nesti prau, asitiáu nel llugar d'El Muru, namás medra la yerba, pero nun grana nenguna otra planta, anque seya semada cola meyor semiente. Ye un terrén que tien daqué especial y que peles nueches se tresforma en llugar lluminosu. Pel camín que lleva dende El Muru a Las Vallinas y a Arancés, col que fai llende'l prau, les pisaes de los que pasen per él van dexando resclavu de lluz, talo como si aquello fuera un maraviosu espaciu de lluciérnegues. N'otros tiempos, non mui alloñaos, cuando la xente diba de filazón, de casa en casa, respigábense al pasar per esti camín máxicu que resplandez nes nueches escures, y al mesmu tiempu, prestaba-yos observar, una y otra vez, aquelles buelgues de lluz que dexaben al andar, y que cuando con ciertu respetu miraben p'atrás, facíen-yos maxinar que pisaben terrén encantao.
Entovía güei, nin vieyos nin mozos son quien pa esplicar esti fenómenu lluminosu. Fálase de que nesi llugar tán afincaos los espíritos de los moros enterraos ellí, va cientos d'años.
(Tomáu del llibru: "Lleendes y otros aspeutos máxicos nel folclor de Castrillón". Mª Esther García López)
https://www.lne.es/blogs/filazon/
