El Parllamentu Européu estableció esti 2018 como Añu Européu del Patrimoniu Cultural col oxetivu de ponelu en valor y concienciar sobre la importancia de protexelu y promocionalu. Na declaración pola que s'institucionalizaba esta efeméride manifiéstase que'l patrimoniu cultural nun ye namás una herencia del pasáu, ye tamién un recursu imprescindible pal futuru, dada la so incuestionable utilidá educativa y social, el so potencial económicu y la so dimensión importante en cooperación internacional.
Nes últimes décades la concepción del patrimoniu d'un territoriu específicu cambió abondo con respecto a lo que tradicionalmente se consideraba como tal. Agora non solo se tien una visión esclusivamente tanxible (fundamentalmente arquitectónica o paisaxística) del mesmu, sinón que tamién elementos de carácter inmaterial (idioma, tradiciones, gastronomía, etc.) formen parte del bagaxe qu'una determinada comunidá humana tien y pue ufiertar. Nesti sen, ún de los mayores avances de la UNESCO foi xenerar un reconocimientu internacional del patrimoniu que nun ye monumental, que forma parte de los pueblos, de la so creatividá y identidá cultural: l'oral y l'intanxible; son testimoniu d'ello la llingua, la lliteratura, la música, la danza, los xuegos, la mitoloxía, los ritos, les costumes, los conocimientos ancestrales y la manufactura d'artesanía.
Nesti contestu ye onde'l Grupu Municipal de Somos Avilés ellaboremos un documentu tituláu "El patrimoniu cultural propiu como instrumentu de desarrollu local sostenible", que quier ser el primeru d'una serie d'ellos dedicaos a diferentes aspectos del mesmu. Según se recueye nél un territoriu ye "intelixente" cuando utiliza los recursos propios d'una forma económica, ambiental y socialmente eficiente, pa xenerar verdaderos procesos de desarrollu territorial integráu. Ún d'estos recursos ye precisamente'l patrimoniu, qu'ha de convertise nun activu básicu pa dinamizar la economía y meyorar asina la calidá de vida de la sociedá qu'habita esos territorios y el desarrollu personal de tola ciudadanía. Nesti sentíu, dende hai yá dellos años vien falándose del capital cultural y de la necesidá de xestionalu amañosamente p'asina algamar non sólo'l bienestar social, sinón tamién el progresu económicu.
Esta primer entrega céntrase dafechu nos aspectos inmateriales del patrimoniu cultural, probablemente de los más desconocíos y en peligru de cayer nel olvidu na nuestra memoria colectiva. Trátase d'un "material sensible" que necesita unes llinies d'actuación concretes que lo popularicen ente la sociedá avilesina. Y ye que, a pesar del nuestru tamañu, el conceyu tien ún de los patrimonios inmateriales más ricu y variáu de toa Asturies, pero que nun cuenta col apoyu, protección y promoción adecuada por parte del Ayuntamientu. Les materies d'análisis y estudiu trataes son bona muestra de la riqueza cultural qu'atesoramos n'Avilés: música, patrimoniu oral, llingua asturiana, lliteratura, xuegos y deportes tradicionales, el bron y la cultura xagotera, y la sidra. De toes elles faise una introducción histórica, con especial atención a la so rellación y incidencia n'Avilés. De siguío propónense una serie d'acciones mui variaes, unes más ambicioses y otres más cencielles, unes pensaes pal llargu plazu y otres que podríen desenvolvese mañana mesmu. Unos exemplos: la creación d'una Escuela de Música Tradicional, la incorporación al futuru Centru d'Interpretación del Cañón d'Avilés d'un "Aula de les Lleendes y los Trabayos Tradicionales de la Ría", la concesión de dos premios lliterarios (el "Miguel Solís Santos" de novela curtia y el "Marcos del Torniello" de poesía), la organización d'un Festival de la Sidra, la puesta en marcha d'una ruta (y una aplicación móvil) dedicada a la lliteratura n'asturianu escrita por autores locales, la señalización de los llugares más importantes rellacionaos cola cultura xagotera (caldereros de Miranda), la puesta en marcha de les Xornaes Musicales "Rufino González-Nuevo" centraes na obra de los compositores asturianos qu'ente los sieglos XIX y XX harmonizaron el cancioneru tradicional, inclusión nes Aules Populares de cursos y talleres sobre'l nuestru patrimoniu lúdicu (xuegos y deportes tradicionales), etc. Como pue vese son numberoses y mui distintes les posibilidaes d'actuación nesti terrén, dende les más cencielles a otres más complexes.
Na ellaboración y redacción d'esti documentu participaron, a lo llargo de meses, una quincena de persones venceyaes toes elles a estos temes, qu'aportaron los sos conocimientos y proposiciones de manera altruista y a les que queremos agradecé-yos el so llabor. La idea última de Somos Avilés con esti trabayu nun ye, por dicilo gráficamente "patrimonializar el patrimoniu", sinón ufiertá-ylu a la sociedá avilesina pa que tome conciencia de la importancia de protexer esti capital inmaterial y a los responsables políticos y culturales locales pa que se comprometan y desarrollen llinies d'actuación nesti sentíu. Too él pue ser una ferramienta de desarrollu local de carácter sostenible, con repercusión nel ámbitu social (cohesión alredor d'él y autoafirmación), de promoción de la ciudá y de reactivación económica.
