Yá contamos dalguna vez l'interés de munchos de los poetes más nuevos por recuperar la plaza pública pa la poesía, sacándola de les páxines de los llibros p'acercala a los oyentes en recitales nocturnos, eso que Pablo X. Suárez llamó con fortuna "timbes poétiques", nes que nun ye nada raro que s'ofreza la posibilidá de participar a cualquier espectador; ye lo que se llama "micro abiertu". Por supuestu, la llectura de poesía en bares y pubs nun ye nenguna novedá (n'Asturies contamos con antecedentes ilustres, como los recitales qu'organizaba per Xixón l'artista lleonés Enrique Carlón nos años setenta baxo la firma del Círculo Surrealista, o les actividaes de Nel Amaro peles cuenques mineres), pero quiciabes sí lo ye l'abundancia de propuestes y el carácter participativu y organizáu col que se desarrollen.
Fame Poétika, una d'estes iniciatives, defínese como "un colectivu que pretende acercar la poesía a la xente, llevándola a los bares y espacios culturales, meciéndola con otres disciplines artístiques". Nació en 2013 de la mano del poeta Diego Solís (Xixón, 1991) a imaxe de les timbes de Suárez y alredor del Espaciu Cultural xixonés La Manzorga, con un funcionamientu mui cenciellu: a través de les redes sociales convócase una llectura de poesía a la que se pue asistir llibremente como recitador (con poemes propios o ayenos) o como públicu. En 2014 editóse un llibru con una "primer selección" baxo'l títulu Las timbas de La Manzorga nel que, en palabres de Solís, prologuista, "se entremezclan sueños, cervezas, nervios, ojalás y nuncas". Ilustráu con fotografíes d'Eduardo Yagüe y pintures de Hazel Elizabeth Morley y Mage, tolos poetes que participen escribiendo n'asturianu y en castellanu nacen na década de los noventa, menos el paraguayu afincáu n'Asturies Cristian David López, de 1987, qu'acaba de publicar nesti 2015 un escelente llibru de poemes, Permiso de residencia.
La segunda entrega de Fame Poética llega agora titulándose Seguimos con Fame y failo de la mano de la editorial Rema y Vive. El prólogu de Nacho (Iglesias) Wings cuenta con cierta candidez l'aventura de la publicación. El colectivu creció, dexó de celebrar los sos alcuentros poéticos únicamente na Manzorga, viaxó a otros sitios d'Asturies pa facer oyer la so voz y diversificó la so propuesta poética con nueves incorporaciones. Ente los diecisiete poetes participantes (once muyeres, un datu destacable) sigue habiendo xente qu'escribe n'asturianu y en castellanu, y prima nos versos que publiquen el desafuegu sentimental y la necesidá de comunicar, de llegar al oyente, propia d'una poesía pensada pa la llectura pública y el recital. Pue sirvir como exemplu Ainara Castelo (Avilés, 1993), que termina'l so poema "Seamos sinceros, cielo" asina: "Todo/ lo que he hecho bien/ en veintiún años/ es desa(r)marme". Anque hai dalgunos colaboradores con más edá, la mayor parte naz na década de los noventa, conformando lo que dalguna vez sentimos definir a Andrés Astur Treceño, poeta del colectivu, como'l Mareo de la lliteratura asturiana, la escuela de la poesía del futuru. La mayor sorpresa, sicasí, recibímosla emocionaos al descubrir l'homenaxe que se-y dedica nesti llibru a Hana Rayan (Jordania, 1983 - Xixón, 2014), abriendo la edición con dos poemes d'esta autora inédita, sobrina de la poeta Esther Prieto.
