La revista de la Fundación Belenos, Asturies (Memoria encesa d'un país), llega al númberu 35 al mesmu tiempu que cumple, nesti añu 2016, venti años de salida ininterrumpida. Rindiendo nel subtítulu homenaxe al poeta Xosé Manuel Valdés (autor d'un únicu llibru de poemes n'asturianu, Memoria encesa), primero semestral y dende 2011 anual, esta revista mira'l futuru d'Asturies dende l'atalaya del presente, un mirador llevantáu sobre la tradición y la historia. Non sobre lo que nos prestaría que fuera, sinón sobre lo que realmente foi y ye: la llingua asturiana que falen los nuesos homes y muyeres, la cultura de tresmisión oral recoyida con meimu, les ocupaciones de cada día, los datos históricos, l'arqueoloxía... Nada ye ayeno a una publicación que dende'l númberu 1 (xunu de 1996) fai seña d'ella mesma con un diseñu atractivu y l'especial curiáu que pon nel tratamientu de la imaxe.
Esti nuevu númberu abre l'entamu con una reflesión sobre la "Damnatio memoriæ", la condena al escaezu na que les Medayes del Principáu d'Asturies vienen sumiendo al asturianismu dende 1986. Citen dos excepciones ente les dos centenes de medayes concedíes, la del gaiteru José Ángel Hevia y la del grupu Nuberu. Yo añadiría una más, la de la poeta valdesana Nené Losada Rico, asturianista que la recibió en 2005. Y celebren como una escentricidá que se-y concediera en 2015 a Lisardo Lombardía, presidente de la Fundación Belenos qu'edita la revista y director xeneral del festival Intercélticu de Lorient. "Una escentricidá bien amañosa -dicen-, reconocencia a una xeneración d'asturianistes que de magar los años 70 punxeron l'alma n'entender, estudiar, mirar, dibuxar, rescatar a una Asturies que tamién yera l'Asturies real. Ye imposible albidrar -siguen- si esta reconocencia supón una normalización nel reconocimientu institucional d'esa parte de la socieda ausente" (como lo pudiera ser la designación del académicu Genaro Alonso Mejido como Conseyeru d'Educación y Cultura, señalen) "o una anécdota más".
El cuerpu de la revista trai nueve colaboraciones variaes, dende l'inicial que s'ocupa de les aves acuátiques nos estuarios (Fernando Montes), pasando por trabayos sobre monstruos (Cristobo de Milio), la evolución del castru a la villa nel sieglu XI (Xuan Pedrayes), la igresia de San Pedo Ferreros na Ribera (Rogelio Ruiz y Macario González), les semeyes estereoscópiques de Celso Gómez (Juaco López), los esconxuros contra la tona (Álvarez Peña) o nuevos datos del llobu cerval (Peña, Carlos Nores, Adrián Vigil y Gausón Fernande) y el trabayu sobre les viñes y el vinu de Cangas (Carolina Pelaz). Inaciu Llope encárgase del "Estoxu" o espaciu destináu a reseñes bibliográfiques o noticies al final de la revista. Pero quiciabes seya l'estudiu sobre la edá d'oru de les producciones vidriaes de pierto Ca Xuanín en Faro, nos sieglos XVII-XVIII (d'Alfonso Fanjul, Javier Sánchez, Olatz Cordero y Patricia Argüelles), el que meyor recueye l'espíritu d'esta publicación: cuando parez tar bien cerca esi muséu o centru d'interpretación de la cerámica de Faro parez más oportuno que nunca escarbar na tierra y rescatar la memoria d'un daquellos fornos. Como vien faciendo esta revista, esperamos qu'esi centru sobre la cerámica de Faro qu'entama l'Ayuntamientu d'Uviéu siga falando, como caduna de les pieces salíes de Faro (xarres, escudielles, platos, barbones...) tamién n'asturianu.
