Quiciabes nun seya yo la persona más indicada pa falar del númberu 3 d'esta revista, Brixel, na que colaboro con unes traducciones d'Apollinaire, contesto a una entrevista y salen un par de reseñes de llibros míos. Sicasí, como hai abondes más coses nes 24 páxines d'esta publicación anual, bien interesantes, quiero facer posa nella. En primer llugar, pa celebrar que siga saliendo puntualmente dende hai tres años. La lliteratura asturiana, en crisis dende hai cuatrocientos años (nun olvidemos que naz y se desarrolla al mesmu tiempu que la llingua zalla), anda mui necesitada d'allegríes, y l'aparición d'esti númberu, variáu y calidable, dexa echar un vistazu a una parte de lo que se ta faciendo y comprobar qu'esa crisis, permanente y antigua, ye estructural y non creativa. En segundu llugar, permite que nos reafirmemos nuna vieya idea: cada empresa editorial echa una mirada distinta a la mesma realidá, y la pluralidá resulta imprescindible pa que'l sistema lliterariu asturianu se construya dende perspectives diferentes. Mirando esta publicación dámonos cuenta de lo muncho qu'echamos de menos Ámbitu, la empresa qu'editaba Les Noticies y que publicó una tonga de llibros, na que deprendieron l'oficiu los editores de B. Alto, Alberto Suárez y Henrique G. Facuriella, esti últimu tamién director d'esta revista.
Dalgo del estilu Ámbitu pervive nos colaboradores de Brixel. Alberto Suárez, Facuriella (fai un averamientu a Yeats y una entrevista a Ángeles Carbajal), Damián Barreiro (entrevista a Cristóbal Ruitiña), Raquel Friera, Rosario Hernández Catalán, Juan Carlos Aparicio (fala de l'arquitectura n'Uviéu) o Sibisse Rodríguez son firmes que podíamos lleer nes Noticies. Raquel F. Menéndez, estudiante universitaria que yá colaborara na entrega anterior d'esta publicación, representa eses voces xóvenes qu'empiecen a oyese con fuerza na lliteratura asturiana. Poeta ella mesma, ocúpase equí de La prueba del once (2015), l'antoloxía de la poesía asturiana del sieglu XXI, faciendo un análisis atináu de los poetes antologaos y les sos poétiques. Sobre la poesía más moza fala tamién Hernández Catalá, emprestando atención a la oralidá y a una poeta conocida nes timbes poétiques y n'otres actuaciones: Alba .G (nacida en 1992), a la que presenta escribiendo "poesía queer, poesía feminista, poesía de realismu suciu, poesía posporno, poesía poligonera, poesía ninja y poesía puta".
Esti númberu 3 de Brixel complétase con dalgunes reseñes (una d'elles firmada por José Luis Rendueles) y un capítulu de la tercer parte de Fontenebrosa, la novela de Vicente García Oliva qu'acaba de ganar el premiu "María Josefa Canellada" de lliteratura xuvenil. Pero llama l'atención, pola claridá espositiva y la reclamación firme que fai, l'editorial col qu'abre esta entrega, "Cambios necesarios", sobre la política d'ayudes a la edición de llibros asturianos. Quéxase de que nos últimos tres años cambiaron les bases d'axudicación hasta convertiles "en non eficaces. Y ayudes que nun ayuden son cargues". Terminen proponiendo una revisión d'esos criterios y una serie de midíes que permita la pervivencia del sistema lliterariu asturianu: novedaes nes biblioteques, fomentu de la llectura n'asturianu, presencia de la lliteratura nos medios de comunicación públicos nes hores de mayor audiencia y participación editorial en feries xeneralistes. Echo de menos nesi editorial una reivindicación más activa del papel del escritor, el gran olvidáu de l'alministración asturiana y del asturianismu.
