Cuando José Maldonado volvió a Asturies en 1977 facíalo como presidente de la República nel exiliu. Cuarenta años enantes marchara de Xixón, nun pesqueru, como conseyeru d'Obres Públiques del Conseyu Soberanu d'Asturies y Lleón. En Tuña, nel homenaxe al Xeneral Riego, alcontróse con Luis Rey, un vieyu militante d'Esquierda Republicana, combatiente na guerra, que quedara nel cai de Xixón el 20 d'ochobre de 1937 esperando esfotáu una evacuación ordenada que nun llegó a producise. Na conversación que mantuvieron, ensin testigos, Rey pidió esplicaciones y Maldonado hubo dá-yles, porque la llarga parolada acabó nun abrazu emocionáu que se fixera esperar los cuarenta años de dictadura. Antonio Martínez Fernández (Neda, 1980), historiador que yá s'ocupó en 2009 del "Exiliu asturianu (1937-1939)", traza agora'l día a día d'aquella llarga migración, que foi aumentando a midida que les tropes franquistes ocupaben territorios nel frente norte. Martínez empieza contextualizando'l casu asturianu dientro de les emigraciones de la Guerra Civil. N'abril del 37 empieza la evacuación dende Bilbao, que s'intensifica en xunu, hacia Francia, Inglaterra y Santander. Cuando cai Santander n'agostu la evacuación faise desordenada, hacia Francia y hacia Asturies principalmente, completándose la cayida del frente norte n'ochobre de 1937.
En 1937 La evacuación d'Asturies na Guerra Civil. Hestoria y memoria l'autor consigue un doble aciertu: per un llau, como historiador, documenta los movimientos de persones, aproximando cifres (seique 200.000 del País Vascu, Cantabria y Asturies; ente 57.000 y 76.000 namás dende Asturies) y estableciendo la cronoloxía de los fechos: Asturies como receptora de refuxaos col llevantamientu militar, a partir de xunu del 37 les evacuaciones regulaes de muyeres, nenos, homes fuera d'edá militar y incapacitaos, les fugues incontrolaes cuando l'enemigu s'avera, la fallida evacuación final, una desbandada, que dexa en Xixón a miles de persones comprometíes cola República mientres qu'otres pasen a Francia en tou tipu d'embarcaciones. El trabayu pon de manifiestu'l llabor humanitariu que desarrollen los barcos británicos recoyendo y tresladando refuxaos. Xunto a estos datos, que nos permiten facenos idea del movimientu de persones, Martínez recueye testimonios, unes veces orales y otros escritos, de xente que vivió la evacuación y que nos cuenta la so peripecia personal: el miedu, la presión que fai que dalgunos militares se suiciden, una navegación incierta, la llegada a puertu... La parte final del llibru estudia la política sobre población refuxada en Francia, que se va endureciendo, y en Cataluña, onde'l Centru Asturianu de Barcelona funciona como un serviciu oficial d'axuda.
Quiciabes porque esti trabayu d'Antonio Martínez Fernández, tesis fin de máster, tea n'asturianu, sorprende más que nun recueya na bibliografía ún de los primeros trabayos que s'escribieron sobre la evacuación d'Asturies, tamién n'asturianu: el que publicó Lisardo Lombardía nel númberu 4 (avientu de 1997) de la revista "Asturies, Memoria encesa d'un país" sobre la Bretaña francesa como puertu d'acoyida, un trabayu que-y sirvió a Etelvino González (que sí figura na bibliografía) p'aproximar les cifres de refuxaos y que da una idea clara de cómo se vivió dende Francia la llegada de miles de seres humanos qu'escapaben de la guerra.
