Ricardo Candás (Xixón, 1977) ye un poeta singular nel panorama lliterariu asturianu. Van yá diez años desque publicara'l primeru de los sos llibros, Quiciás seya payares, que recibiera en 2005 el premiu "Fernán-Coronas" de poesía. El so nome foi vinculándose ensiguida a los principales gallardones que se conceden n'Asturies: el Llorienzu Novo Mier de l'Academia, el Nené Losada o el Xuan María Acebal. Tantu escaezu, el llibru que nos ocupa, ye la so quinta entrega poética, la primera que se presenta ensin llegar arropada por nengún premiu. Depués de cinco llibros de poesía resultaba del mayor interés observar el camín pel que transitaba agora esti poeta, comprobar si la evolución entevista nos volúmenes anteriores se consolidaba, si se caltenía fiel a los principios poéticos d'aquel primer llibru, nel que reflesionaba sobre la creación lliteraria procurando que les palabres formaren parte del misteriu de lo oculto. Naufraxos (2013), que tien continuidá en Superficie del silenciu (2014), supunxo un puntu d'inflexión na so obra; ensin dexar de buscar l'esencialismu de la expresión poética, estes dos obres yeren más comunicatives, anque siguía siendo la d'él una poesía ensin espaciu o tiempos concretos, que reflesiona sobre ella mesma.
Una primer llectura de Tantu escaezu ofrecía delles novedaes, pero como si caminaren nuna dirección distinta de les dos últimes entregues, como si'l poeta quixera desandar lo recorrío nesos dos llibros, como si buscara otra sienda distinta qu'enllazara colos poemes de Nos díes pensatibles (2011). Nun ye asina: anque nada informa'l propiu llibru (una notina convenía, axudando al llector a situase), Ricardo Candás esplica nuna entrevista que estos versos nun son los últimos qu'escribió, sinón obra fecho ente'l llibru de 2011 y Naufraxos, trenta poemes pesimistes, qu'afonden n'esperiencies "negatives del pasáu, sobre les que se construi'l futuru". La poesía inicial d'esti autor tenía vocación metapoética y metafísica, y dalgo d'ello volvemos alcontrar nestos versos, nos que la lluz vuelve a mancar y nos que la señaldá, la condición tan asturiana del solitariu, ye'l cementu col que se construin.
Frente a la vocación comunicativa de los dos últimos llibros, Tantu escaezu resulta herméticu, de manera que la indagación interior, anque ye esencialmente llingüística, ábrese a un "nós" desconocíu. El tu col que dialoga'l poeta nesti llibru yá nun ye'l desdoblamientu del propiu yo como entendimos nes primeres entregues, sinón dalguién ayenu que trai guapura, amor, felicidá...: "Tamién / tenrura tres la que t'escuendes / enantes d'aportar a casa." Asina, la presencia d'esi tu consigue romper l'acumulación de palabres negatives sobre la que Candás aveza a construyir los sos versos, nos qu'habita'l fríu, el cansanciu, la murnia, la llamaza o el desencantu. Frente a un poema como "Soi" (p. 31), qu'enllaza directamente colos dos primeros llibros ("Soi'l mio nome y cuanto pesa" diz l'últimu versu), en "Somos" (p. 39) "trayemos / a nuestra casa tolos nicios / del contentu", alimentamos la memoria, alcontramos amor. Ye difícil saber si'l camín pel que transiten estos poemes va tener continuidá na obra futura de Ricardo Candás o si se trata namás d'un puñáu interesante de versos que quedó nos araxales de la so obra y que recupera pa los llectores como quien quita un pesu d'enriba, pero nesa llucha ente contrarios que s'enllazan y s'oponen queda abierta una resquieta a la esperanza: "Nun paga / la pena siguir per esta sienda / cuando hai tanta paz // guañando na memoria".
