La Nueva España

La Nueva España

Contenido exclusivo para suscriptores digitales

Lletres Asturianes

Llingua asturiana y Universidá d´Uviéu: responsabilidá y afirmación institucional

Ante un nuevu momentu históricu

La Universidá d´Uviéu tira a vese bien de veces como una institución sospechosa no que se refier a les sos relaciones col asturianu. El tópicu d´una universidá zarrada, endogámica y elitista ayena a los intereses verdaderos de la sociedá tien como epifenómenu asturianista la rocea por una supuesta falta de sensibilidá no que fai a cuestiones específiques de historia, cultura o llingua del país. Como tou tópicu, esti participa tanto d´un fondu de realidá como d´un acriticismu cansín y seguramente interesosu. Sicasí, lo cierto ye que´l fechu de qu´un tópicu talu siga activu nel debate públicu respuende, ente otres coses, al pocu interés de la institución académica en desacreditalu. A la universidá nun-y diba resultar difícil poner enriba la mesa un importante bagaxe propiu de trabayu asturianista; así que, paradóxicamente, el que nun lo faiga sí que val como prueba d´un ciertu y censurable desdeñu pa colos enfotos y espectatives que la sociedá asturiana deposita nella.

La historia de la Universidá d´Uviéu desenvuélvese dende la so fundación en 1608 en relación estrecha cola llingua asturiana. Por casu, a ún de los sos primeros profesores (el cangués Luis Alfonso de Carvallo) debémos-y les primeres reflexones intelectuales mínimamente estructuraes sobre l´asturianu y a ún de los sos primeros alumnos (Antón de Marirreguera) les primeres composiciones poétiques nesta llingua. De magar, la relación de la institución cola llingua y la cultura asturiana foi discontinua pero permanente, con una retafila llarga de nomes propios (de profesores, alumnos ya incluso rectores, con Fermín Canella o Félix Aramburu como referencies más notables) directamente implicaos nel estudiu, la creación o la promoción y reinvindicación del asturianu, dientro de les coordenaes propies de cada momentu históricu.

Con tolos claroscuros que puedan alvertise, esi llabor tuvo continuidá hasta l´actualidá, cuando la Universidá d´Uviéu foi seguramente´l más importante motor del asturianismu modernu, per onde pasaron, formándose y organizándose, los más de los estudiosos, creadores y activistes del llamáu Surdimientu. La propia universidá como institución puede llucir la so propia contribución a la reivindicación y al prestixu social del asturianu. Por centranos n´aspectos puramente académicos: non menos del 90% d´esa investigación sobre la llingua d´Asturies ye investigación universitaria, fecha por persones formaes na Universidá d´Uviéu, que pueden faela porque cobren nómines de la Universidá d´Uviéu, n´instalaciones de la Universidá d´Uviéu, con medios ya infraestructures de la Universidá d´Uviéu, con recursos pa dietes, congresos, proyectos d´investigación, publicaciones y beneficiaes pola rede de relaciones institucionales y académiques que favorez la Universidá d´Uviéu en razón del so propiu prestixu históricu, que dalgunu tien. Tocantes a la docencia, dende va pocos años, la Universidá inclúi nos sos planes reglaos unos módulos d´estudios especializaos de llingua asturiana nes facultaes de Filosofía y Lletres y Formación de Profesoráu, con un tratamientu desigual y unos problemes propios sobre los que les autoridaes competentes tán puntualmente informaes.

¿Qué ye entós lo que falla pa que la Universidá nun acabe de vese y actuar como un referente respetable ya imprescindible con respectu al llabor asturianista? Básicamente, creelo y asumilo institucionalmente. La Universidá d´Uviéu tenía qu´empezar per reivindicar ensin complexos y faer propiu tou esi valumbu intelectual asturianista que non solo acumula unos cuantos sieglos d´actividá, sinón que-y lleva una parte determinada de los sos recursos actuales y representa otra nada despreciable de l´actividá académica de ciertes facultaes, especialmente la de Filosofía y Lletres. Sía como quier, vender los llogros del asturianismu actual ensin un reconocimientu esplícitu de les aportaciones universitaries ye malicioso y fraudulento. Arguméntase con una simple resta.

Les recientes elecciones rectorales supunxeron un significativu pasu alantre na autoafirmación asturianista de la institución. Los dos candidatos finales (Santiago García Granda y José Muñiz) non solo incorporaron a los sos programes una llinia d´actuación sobre l´asturianu, sinón qu´usaron ensin complexos esta llingua na difusión de los mesmos. Igualmente, Pedro Sánchez Lazo y Agustín Costa mostraron sobre la cuestión un interés y disposición que ye bien d´estimar y aponderar públicamente. El rector electu, de reconocida sensibilidá asturianista, tien agora per delantre retos importantes que nun desconoz y colos que ya mostró un compromisu esplícitu. El más grave, correxir la difícil situación del Mínor d´Asturianu y l´incomprensible y anómalu tratu alministrativu que vien padeciendo.

La Universidá afronta un nuevu momentu históricu que bien merez l´enfotu de tola comunidá, docentes, estudiantes y personal alministrativu, asturianistes o non. Nel tema que nos ocupa, y fora de polítiques concretes, ye d´esperar de los nuevos xestores un renováu sentíu institucional que faiga honor a cuatro sieglos llargos d´historia universitaria asturiana y asturianista. Yera de prestar qu´esta nueva Universidá (d´acordies colo qu´espera d´ella la sociedá a la que sirve) s´alcordara de falar nel so propiu nome y asina poner a valir tola fuerza qu´emana del so propiu caudal intelectual y moral y, poques gracies, tola autoridá que la llei y los sos propios estatutos establecen en materia llingüística. El principiu d´autonomía académica tien tamién aquí sentíu plenu y nin la Universidá tien que pidir perdón a nun se sabe quién, nin precisa de l´aprobación benevolente d´otres instancies con relación a lo qu´ella mesma faiga colos sos propios recursos y d´acordies cola so propia naturaleza, universitaria y asturiana.

Compartir el artículo

stats